close
Choose your channels

ஓடும் காரில் இருந்து தள்ளிவிடப்பட்ட பெண்: குடும்பத்துடன் கணவர் தலைமறைவு

Tuesday, June 11, 2019 • தமிழ் Comments

ஓடும் காரில் இருந்து ஒரு பெண்ணை அவரது கணவரும் கணவரின் குடும்பத்தார்களும் தள்ளிவிடப்பட்ட சிசிடிவி காட்சி சமூக வலைத்தளங்களில் வைரலாகி வருகிறது

கோவையைச் சேர்ந்த அமல்ராஜ் என்பவருக்கும் ஆர்த்தி என்ற பெண்ணுக்கும் கடந்த 2008-ஆம் ஆண்டு திருமணம் நடந்தது. ஆனால் திருமணமான சில மாதங்க்ளிலேயே இருவருக்கும் இடையே கருத்து வேறுபாடு ஏற்பட்டதால் கடந்த சில ஆண்டுகளாக பிரிந்து வாழ்ந்து வந்தனர். இந்த நிலையில் இருதரப்பின் பெரியோர்கள் மீண்டும் இருவரிடமும் சமாதானப் பேச்சுவார்த்தை நடத்தியதை அடுத்து அண்மையில் மீண்டும் சேர்ந்து வாழ முடிவு செய்தனர்.

இந்த நிலையில் அமல்ராஜ் தனது மனைவி ஆர்த்தி மற்றும் பெற்றோருடன் காரில் சென்று கொண்டிருந்த போது மீண்டும் இருவருக்கும் தகராறு ஏற்பட்டதாக தெரிகிறது. ஒரு கட்டத்தில் தகராறு முற்றியதை அடுத்து அமல்ராஜ் மற்றும் அவரது பெற்றோர்கள் ஆர்த்தியை ஓடும் காரில் இருந்து கீழே தள்ளிவிட்டனர். காரில் இருந்து ஆர்த்தி கீழே விழுந்ததை கண்டு அந்த பகுதி மக்கள் அதிர்ச்சி அடைந்து அவரை மருத்துவமனையில் சேர்த்தனர். இந்த காட்சி அப்பகுதியில் இருந்த சிசிடிவியில் பதிவாகியுள்ளது. இந்த வீடியோதான் தற்போது இணையதளங்களில் வைரலாகி வருகிறது.

தன்னை தனது கணவரும் அவருடைய பெற்றோரும் தான் காரில் இருந்து கீழே தள்ளியதாக மருத்துவமனையில் சிகிச்சை பெற்று வரும் ஆர்த்தி, போலீசாரிடம் புகார் தெரிவித்துள்ளார். இதனையடுத்து அமல்ராஜ் மற்றும் அவருடைய பெற்றோர் மீது போலீசார் வழக்குப்பதிவு செய்து தலைமறைவாகியுள்ள அவர்களை தேடி வருகின்றனர்.
 

Get Breaking News Alerts From IndiaGlitz