காங்கிரஸில் இணைந்த பிக்பாஸ் டைட்டில் வென்ற நடிகை
- IndiaGlitz, [Wednesday,February 06 2019]
பிக்பாஸ் இந்தி சீசன் 11 டைட்டில் வின்னரும் பிரபல பாலிவுட் மற்றும் தொலைக்காட்சி நடிகையுமான ஷில்பா ஷிண்டே காங்கிரஸ் கட்சியில் தன்னை இணைத்து கொண்டார்.
நாடாளுமன்ற தேர்தல் நெருங்கி வரும் நிலையில் காங்கிரஸ் மற்றும் பாஜக ஆகிய இரண்டு தேசிய கட்சிகளிலும் திரையுலக பிரபலங்கள் இணைந்து வரும் நிலையில் நேற்று மும்பையில் நடைபெற்ற காங்கிரஸ் கட்சியின் நிகழ்ச்சியில் அக்கட்சியின் மும்பையில் நகர காங்கிரஸ் தலைவர் சஞ்சய் நிருபம் முன்னிலையில் பிரபல பாலிவுட் நடிகை ஷில்பா ஷிண்டே தன்னை காங்கிரஸ் கட்சியில் இணைத்துக் கொண்டார்.
காங்கிரஸ் கட்சியின் உறுப்பினராக இணைந்த பின்னர் நடிகை ஷில்பா ஷிண்டே செய்தியாளர்களிடம் கூறியபோது, 'பல ஆண்டுகளாக காங்கிரஸ் ஆட்சி நாட்டை செய்துள்ளது. இதனால் இந்த கட்சியில் சேர முடிவு செய்தேன். தற்போது நமக்கு மாற்றம் தேவை. அந்த மாற்றத்தை காங்கிரஸ் கட்சியால் மட்டுமே கொண்டு வர முடியும் என நம்புகிறேன்.
நாட்டின் அடுத்த பிரதமராக காங்கிரஸ் தலைவர் ராகுல் காந்தி பதவியேற்க வேண்டும் என்பதே எனது விருப்பம். மேலும் காங்கிரஸ் கட்சியில் ஜாதி, மதம் பார்ப்பதில்லை என்று ஷில்பா கூறியுள்ளார்.