முதல்வர் ஓபிஎஸ்-க்கு இரண்டு அதிமுக எம்பிக்கள் ஆதரவு
- IndiaGlitz, [Saturday,February 11 2017]
தமிழக அரசியல் தற்போது முயல்-ஆமை கதை போல சென்று கொண்டிருக்கின்றது. ஆரம்பத்தில் 130 எம்.எல்.ஏக்களும், 37 எம்பிக்களும் சசிகலாவுக்கு ஆதரவு என்றும், முதல்வர் ஓபிஎஸ் அவர்களுக்கு வெறும் 3 எம்.எல்.ஏக்கள் மட்டுமே ஆதரவு என்று கூறப்பட்ட நிலையில் தற்போது வேகமாக முயல் தூங்கியது போலவும், மெதுவாக சென்ற ஆமை வெற்றி பெற்றது போலவும் ஓபிஎஸ் அவர்களின் கை ஓங்கி வருகிறது.
முதல்கட்டமாக அவைத்தலைவர் மதுசூதனன், பி.எச்.பாண்டியன், நத்தம் விஸ்வநாதன், மைத்ரேயன், ஆகிய முக்கிய தலைவர்கள் ஓபிஎஸ் அவர்களுக்கு தங்களது முழு ஆதரவை கொடுத்துள்ள நிலையில் தற்போது முதலமைச்சர் பன்னீர்செல்வம் அவர்களுக்கு கிருஷ்ணகிரி தொகுதி எம்.பி. அசோக்குமார் மற்றும் நாமக்கல் தொகுதி எம்.பி. சுந்தரம் ஆகியோர் ஆதரவு அளித்துள்ளனர்.
மேலும் கூவத்தூரில் அடைத்து வைக்கப்பட்டுள்ள எம்.எல்.ஏக்களை விடுவித்தால் மேலும் பலர் ஓபிஎஸ் அவர்களுக்கு ஆதரவு கொடுக்கவிருப்பது தெரியவரும் என்றும், இறுதியில் ஓபிஎஸ் அவர்களே வெல்வார் என்றும் அதிமுக வட்டாரங்கள் கூறுகின்றன.