పునీత్ కుటుంబాన్ని పరామర్శించిన అల్లు అర్జున్.. ఫోటోను తడుముతూ బన్నీ భావోద్వేగం
- IndiaGlitz, [Thursday,February 03 2022]
కన్నడ పవర్‌స్టార్ పునీత్ రాజ్కుమార్ మరణం నుంచి ఇంకా చిత్ర పరిశ్రమ, అభిమానులు, సన్నిహితులు కోలుకోలేదు. నిత్యం ఎక్కడో ఒక చోట ఆయన ప్రస్తావన వస్తూనే వుంది. అనాథాశ్రమాలు, వృద్ధాశ్రమాలు, వందల మంది ఆడపిల్లలకు ఉచిత విద్య అందించడంతో పాటు నటుడు, నిర్మాత, సింగర్, హోస్ట్‌గా పునీత్ వేసిన ముద్ర సాధారణమైనది కాదు. ఇక స్నేహానికి ఎంతో ప్రాధాన్యత ఇస్తారు పునీత్ రాజ్కుమార్. అందుకే ఆయనకు శాండిల్‌వుడ్‌తో పాటు యావత్ భారతీయ సినీ రంగంలో మంచి ఫ్రెండ్స్ వున్నారు.
తాజాగా పునీత్ రాజ్కుమార్ కుటుంబాన్ని ఐకాన్ స్టార్ అల్లు అర్జున్ పరామర్శించారు. గురువారం బెంగళూరు వెళ్లిన బన్నీ.. నేరుగా పునీత్ ఇంటికి చేరుకున్నారు. పునీత్ కుటుంబ సభ్యులను పరామర్శించి తన ప్రగాఢ సానుభూతి తెలిపారు. అనంతరం కంఠీరవ స్టేడియంలో పునీత్ సమాధిని సందర్శించి నివాళులు అర్పించారు అల్లు అర్జున్.
కొద్దిరోజుల క్రితం మెగా పవర్‌స్టార్ రామ్చరణ్ కూడా పునీత్ రాజ్ కుమార్ కుటుంబాన్ని పరామర్శించారు. పునీత్ చ‌నిపోవ‌డం మా కుటుంబంలో వ్య‌క్తిని పొగొట్టుకున్నంత బాధ‌గా ఉందని చరణ్ ఆవేదన వ్యక్తం చేశారు. మా ఇంటికొస్తే ఆయన ముందు మేమే గెస్ట్‌లాగా ఫీల‌య్యేలా చేస్తారని... వ్య‌క్తుల‌ను సొంతవాళ్ల‌లా చూసుకుంటారని రామ్చరణ్ అన్నారు. సినీ పరిశ్రమకు, సోసైటీకి పునీత్ ఎంతో సేవ చేశారని చెర్రీ ప్రశంసించారు.