ஆகஸ்ட் முதல் அக்டோபர் வரை முன்னணி நடிகர்களின் திரைப்படங்கள் வெளியாக இருப்பதை அடுத்து சினிமா ரசிகர்களுக்கு செம்ம விருந்து காத்திருக்கிறது என்பது உறுதியாகி உள்ளது.

சூப்பர் ஸ்டார் ரஜினிகாந்த் நடித்த ’ஜெயிலர்’ திரைப்படம் ஆகஸ்ட் 10ஆம் தேதி வெளியாகும் என சமீபத்தில் அதிகாரப்பூர்வமாக அறிவிக்கப்பட்டது. அதேபோல் பாலிவுட் சூப்பர் ஸ்டார் ஷாருக்கானின் ’ஜவான்” திரைப்படம் செப்டம்பர் 7ஆம் தேதியும் பிரபாஸ் நடித்த ’சலார்’ திரைப்படம் செப்டம்பர் 28ஆம் தேதியும் வெளியாகவுள்ளது.

இதனை அடுத்து அக்டோபர் மாதம் ஆயுத பூஜை விடுமுறையில் தளபதி விஜய்யின் ’லியோ’ திரைப்படம் வெளியாக உள்ளது. எனவே வரிசையாக பெரிய நடிகர்களின் படங்கள் வெளியாக இருப்பதை அடுத்து சினிமா தியேட்டர்களில் ரசிகர்கள் கூட்டம் நிரம்பி வழியும் என்று எதிர்பார்க்கப்படுகிறது.

ஆகஸ்ட் மாதத்திற்கு முன்பே ஜூன் 16ஆம் தேதி ‘ஆதி புருஷ்’, ஜூலை 14ஆம் தேதி சிவகார்த்திகேயன் நடித்த ‘மாவீரன்’ திரைப்படம் வெளியாக உள்ளது. அதேபோல் ஜூலை 28ஆம் தேதி விஷாலின் ’மார்க் ஆண்டனி’ திரைப்படம் வெளியாகும் என்று எதிர்பார்க்கப்படுகிறது.

மேலும் கமல்ஹாசனின் ‘இந்தியன் 2’, சூர்யாவின் ‘கங்குவா’, சிவகார்த்திகேயனின் ‘அயலான்’, கார்த்தியின் ‘ஜப்பான்’, ராகவா லாரன்ஸின் ‘சந்திரமுகி 2’, தனுஷின் ‘கேப்டன் மில்லர்’, விக்ரமின் ‘துருவ நட்சத்திரம்’ ஆகிய படங்களும் இந்த ஆண்டு இறுதியில் அல்லது அடுத்த ஆண்டு ஆரம்பத்தில் வெளியாகவுள்ளன.

மொத்தத்தில் அனைத்து தரப்பு சினிமா ரசிகர்களுக்கு இன்னும் சில மாதங்களுக்கு மிகச் சிறந்த விருந்து காத்திருக்கிறது என்பது உறுதியாகிறது.