என்னுடைய திருமணம் நின்றதற்கு இதுதான் காரணம்: பிக்பாஸ் தமிழ் நடிகை
- IndiaGlitz, [Saturday,July 03 2021]
பிக்பாஸ் தமிழ் நிகழ்ச்சியின் போட்டியாளர்களில் ஒருவரும் நடிகையுமான காஜல் பசுபதி, தனது சமூக வலைத்தளத்தில் கடந்த சில ஆண்டுகளாக பாஜகவுக்கு எதிரான கருத்துக்களை தெரிவித்து வரும் நிலையில் தற்போது தனது திருமணம் நின்றதற்கும் பாஜகதான் காரணம் என்று கூறியுள்ளது பெரும் பரபரப்பை ஏற்படுத்தி உள்ளது.
நடிகை காஜல் பசுபதி, கடந்த சில ஆண்டுகளுக்கு முன் டான்ஸ் மாஸ்டர் சாண்டியை திருமணம் செய்து அதன்பின் அவரை விவாகரத்து செய்து விட்டார். இந்த நிலையில் கடந்த வாரம் திடீரென தனது டுவிட்டர் பக்கத்தில் தனக்கு திருமணம் நிச்சயம் செய்யப்பட்டிருப்பதாகவும், இன்னும் ஒரு வாரத்தில் திருமணம் என்றும், கொரோனா காரணமாக யாரையும் அழைக்க முடியவில்லை என்றும் குறிப்பிட்டிருந்தார். இதனையடுத்து அவர் யாரை திருமணம் செய்யப்போகிறார்? என்று ரசிகர்கள் கேள்வி எழுப்பிய வண்ணம் இருந்தனர். ஆனால் இந்த திருமண டுவிட் வேடிக்கையாக போடப்பட்ட காப்பிபேஸ்ட் டுவிட் என்று அதன் பிறகு தெரிய வந்தது.
இந்த நிலையில் மீண்டும் தனது திருமணம் குறித்து கூறியுள்ள காஜல் பசுபதி ’தனது திருமணம் நின்றுவிட்டதற்கு காரணம் பாஜகதான் என்றும், கடைசி நேரத்தில் மாப்பிள்ளை ஒரு பாஜககாரர் என்று தெரிய வந்ததால் திருமணத்தை நிறுத்தி விட்டேன் என்றும் மீண்டும் வேடிக்கையாக குறிப்பிட்டுள்ளார்.