தமிழகத்தில் திரையிட காங்கிரஸ் கட்சி தடை கோரும் திரைப்படம்
- IndiaGlitz, [Wednesday,January 02 2019]
திரைப்படத்தை திரைப்படமாக பார்க்காமல் அந்த திரைப்படத்திற்கு தடை கோரி அரசியல் கட்சிகள் போராட்டம் செய்வது கடந்த சில ஆண்டுகளாக அதிகரித்து வருகிறது. இந்த நிலையில் தமிழக காங்கிரஸ் கமிட்டி சார்பிலும் ஒரு திரைப்படத்தை திரையிட எதிர்ப்பு தெரிவிக்கப்பட்டுள்ளது.
முன்னாள் இந்திய பிரதமர் மன்மோகன்சிங் அவர்களின் வாழ்க்கை வரலாறு குறித்த திரைப்படம் 'The Accidental Prime Minister'. இந்த படம் வரும் 11ஆம் தேதி முதல் தமிழகம் உள்பட உலகம் முழுவதும் வெளியாகவுள்ளது. மன்மோகன்சிங் வேடத்தில் அனுபம்கேர் நடித்துள்ள இந்த இந்தி திரைப்படத்தை தமிழகத்தில் திரையிட அனுமதிக்க கூடாது என தமிழக தலைமைச்செயலாளர், உள்துறைச் செயலாளரிடம் தமிழ்நாடு காங்கிரஸ் கமிட்டி சார்பில் கோரிக்கை மனு அளிக்கப்பட்டுள்ளது.
எதிர்பாராத வகையில் மன்மோகன்சிங் அவர்கள் இந்திய பிரதமர் ஆனது முதல் அவர் ஆட்சி செய்த பத்து ஆண்டுகளில் நடந்த முக்கிய நிகழ்வுகள் இந்த படத்தில் குறிப்பிடப்பட்டுள்ளது. இந்த படத்தில் சோனியா காந்தி, ராகுல்காந்தி, பிரியங்கா காந்தி, லாலு பிரசாத் யாதவ், நரசிம்மராவ், எல்.கே.அத்வானி உள்பட பல கேரக்டர்கள் உள்ளன என்பது குறிப்பிடத்தக்கது