Choreographer Chaitanya:'ఢీ' కొరియోగ్రాఫర్ చైతన్య ఆత్మహత్య.. వాళ్లకు రుణపడి వుంటా, సెల్ఫీ వీడియో వైరల్
- IndiaGlitz, [Monday,May 01 2023]
ఈటీవీలో ప్రసారమయ్యే డ్యాన్స్ షో 'ఢీ'లో కొరియోగ్రాఫర్‌గా రాణిస్తున్న మాస్టర్ చైతన్య ఆత్మహత్య చేసుకున్నారు. నెల్లూరు క్లబ్ హోటల్లో ఆదివారం ఆయన ఉరివేసుకుని బలవన్మరణానికి పాల్పడ్డారు. అప్పులు తీర్చలేకే ఆత్మహత్యకు పాల్పడుతున్నట్లు ఆయన సెల్ఫీ వీడియోలో తెలిపారు. ఆర్ధిక సమస్యల నుంచి బయటపడేందుకు ఎంతగానో ప్రయత్నించినప్పటికీ కుదరలేదని, అందుకే ఆత్మహత్య చేసుకుంటున్నానని చైతన్య వెల్లడించారు. అప్పులు ఇచ్చినవాళ్ల నుంచి వస్తున్న ఒత్తిడి తట్టుకోలేక.. గత్యంతరం లేని పరిస్ధితుల్లోనే ఇలా చేస్తున్నానని చైతన్య తన సెల్పీ వీడియోలో తెలిపారు.
తోటి కొరియోగ్రాఫర్ల దిగ్భ్రాంతి :
తనకు నేమ్, ఫేమ్ ఇచ్చిన ఢీ షోకు ఎప్పటికీ రుణపడి వుంటానని ఆయన తన సెల్ఫీ వీడియోలో పేర్కొన్నారు. ప్రస్తుతం ఈ వీడియో సోషల్ మీడియాలో వైరల్ అవుతోంది. చిన్న వయసులోనే చైతన్య తిరిగిరాని లోకాలకు వెళ్లిపోవడంతో తోటి కొరియోగ్రాఫర్లు, డ్యాన్సర్లు , పలువురు సినీ ప్రముఖులు దిగ్భ్రాంతి వ్యక్తం చేశారు. చైతన్య ఆత్మకు శాంతి కలగాలని ఆకాంక్షిస్తూ సోషల్ మీడియాలో పోస్ట్‌లు పెడుతున్నారు.