దిగ్గజ నటుడు టీ.రాజేందర్‌కు తీవ్ర అస్వస్థత.. ఐసీయూలో చికిత్స
- IndiaGlitz, [Monday,May 23 2022]
దిగ్గజ నటుడు, నిర్మాత, దర్శకుడు టీ.రాజేందర్ తీవ్ర అస్వస్థతకు గురైనట్లుగా తెలుస్తోంది. దీంతో ఆయనను కుటుంబ సభ్యులు చెన్నైలోని ఓ ప్రైవేట్ ఆసుపత్రిలో చేర్పించినట్లుగా మీడియాలో కథనాలు వస్తున్నాయి. నాలుగు రోజుల క్రితతం ఆయన అస్వస్థతకు గురైనట్లుగా తెలుస్తోంది. ప్రస్తుతం ఆయనకు ఐసీయూలో చికిత్స అందిస్తున్నారు. మెరుగైన చికిత్స నిమిత్తం ఆయనను సింగపూర్‌కు తరలించే అవకాశాలు కనిపిస్తున్నాయి. దీనిపై త్వరలోనే నిర్ణయం తీసుకోనున్నట్లు కుటుంబ సభ్యులు చెబుతున్నారు.
రాజేందర్ సతీమణి ఉషా రాజేందర్, కుమారుడు శింబు ఆయన పక్కనే వున్నారని .. ఒకవేళ సింగపూర్‌కి తరలించే పక్షంలో ఆయనతో కలిసే విదేశాలకు వెళతారని సమాచారం. ఈ వార్త తెలుసుకున్న అభిమానులు.. రాజేందర్ కోలుకుని క్షేమంగా తిరిగి రావాలని ఆకాంక్షిస్తూ సోషల్ మీడియాలో పోస్టులు పెడుతున్నారు. ఇందుకు సంబంధించిన మరిన్ని వివరాలు తెలియాల్సి వుంది.