'மஞ்சும்மள் பாய்ஸ்' இயக்குனரின் அடுத்த படத்தில் தமிழ் மாஸ் நடிகரா? செம ஜாக்பாட்..!
- IndiaGlitz, [Tuesday,March 05 2024]
சமீபத்தில் வெளியான மலையாள திரைப்படமான ’மஞ்சும்மள் பாய்ஸ்’ என்ற திரைப்படம் கேரளாவில் மட்டுமின்றி தமிழகத்திலும் வசூலில் சக்கை போடு போடுகிறது என்பதும் இந்த படம் உலகம் முழுவதும் 100 கோடி ரூபாய் வசூல் செய்து விட்டதாக இயக்குனர் சிதம்பரம் தனது சமூக வலைதளத்தில் தெரிவித்திருந்தார் என்பதும் குறிப்பிடத்தக்கது.
ஒரு மலையாளத் திரைப்படம் தமிழில் டப்பிங் செய்யாமல் மலையாளத்திலேயே தமிழகம் முழுவதும் வெளியாகி குடும்ப ஆடியன்ஸ்களையும் கவர்ந்திருப்பது என்பது திரையரங்க உரிமையாளர்களுக்கே ஆச்சரியத்தை ஏற்படுத்தியுள்ளது. ஒரு படத்தின் உண்மையான வெற்றி என்றால் இதுதான் என்று பலர் இந்த படத்தின் குழுவினர்களுக்கு வாழ்த்து தெரிவித்து வருகிறார்கள். அது மட்டும் இன்றி இந்த படத்தில் உள்ள ’குணா’ ரெப்ரன்ஸ் தான் தமிழகத்தில் இந்த படம் மிகப்பெரிய வெற்றி அடைய காரணம் என்றும் கூறப்பட்டு வருகிறது.
இந்நிலையில் ’மஞ்சும்மள் பாய்ஸ்’ படத்தின் இயக்குனர் சிதம்பரத்திற்கு வாய்ப்புகள் குவிந்து வருவதாகவும் குறிப்பாக அவர் தனது அடுத்த படத்தை தமிழில் இயக்க இருப்பதாகவும் கூறப்படுகிறது. கோபுரம் பிலிம்ஸ் இந்த படத்தை தயாரிக்க இருப்பதாகவும் இந்த படத்தில் நாயகனாக தனுஷ் நடிக்க இருப்பதாகவும் இந்த படம் குறித்த அதிகாரபூர்வ அறிவிப்பு விரைவில் வெளியாகும் என்றும் கூறப்படுகிறது.
மேலும் தமிழ் திரையுலகின் முன்னணி தயாரிப்பு நிறுவனமான ரோமியோ பிக்சர்ஸ் நிறுவனத்திற்கு இயக்குனர் சிதம்பரம் ஒரு படம் இயக்க ஒப்புக்கொண்டு இருப்பதாகவும் கூறப்படுகிறது. மொத்தத்தில் ’மஞ்சும்மள் பாய்ஸ்’ வெற்றியால் அந்த படத்தின் இயக்குனர் தனுஷ் படத்தை இயக்கும் அளவுக்கு உச்சத்துக்கு சென்று விட்டதாக கூறப்படுகிறது.