'வடசென்னை 2' எப்போது? இயக்குனர் வெற்றிமாறன் தகவல்..!
- IndiaGlitz, [Thursday,March 09 2023]
தனுஷ் நடிப்பில் வெற்றிமாறன் இயக்கத்தில் உருவான ’வடசென்னை’ திரைப்படம் கடந்த 2018 ஆம் ஆண்டு வெளியானது என்பதும் இந்த படம் அனைத்து தரப்பு ரசிகர்களை கவர்ந்தது என்பது தெரிந்ததே. இந்த நிலையில் இந்த படத்தின் இரண்டாம் பாகத்தை உருவாக்க வேண்டும் என ரசிகர்கள் கடந்த சில ஆண்டுகளாக கோரிக்கை விடுத்து வருகின்றனர்.
சமீபத்தில் நடந்த தனுஷின் ’வாத்தி’ படத்தின் இசை வெளியீட்டு விழாவில் ரசிகர்கள் ’வடசென்னை 2’ படம் குறித்து கோரிக்கை விடுத்தபோது ’வடசென்னை 2’ திரைப்படம் கண்டிப்பாக உருவாகும் என்றும் இதற்கு வெற்றிமாறன் தான் மனது வைக்க வேண்டும் என்றும் அவர் தெரிவித்தார்.
இந்த நிலையில் நேற்று வெற்றிமாறன் இயக்கத்தில் உருவான ’விடுதலை’ திரைப்படத்தின் இசை வெளியீட்டு விழா நடந்த நிலையில் அதில் பேசிய வெற்றிமாறன் ’விடுதலை’ பாகம் ஒன்று மற்றும் இரண்டு பணிகள் முடிந்ததும் ’வாடிவாசல்’ படத்தை தொடங்குவேன் என்றும் தெரிவித்தார். ’வாடிவாசல்’ படத்தின் பணிகள் அனைத்தும் முடிந்த பிறகு ’வடசென்னை 2’ படத்திற்கான வேலைகள் தொடங்கும் என்றும் அவர் குறிப்பிட்டார்.
இதனை அடுத்து அனேகமாக அடுத்த ஆண்டு இறுதியில் 'வடசென்னை 2’ படம் தொடங்கும் என்று எதிர்பார்க்கப்படுகிறது. தனுஷ் உடன் மீண்டும் வெற்றிமாறன் இணையும் 'வடசென்னை 2' திரைப்படம் நிச்சயம் மிகப்பெரிய வெற்றி பெறும் என எதிர்பார்க்கப்படுகிறது.