மலேசியாவில் ’பிச்சைக்காரன் 2’ என்ற படத்தின் படப்பிடிப்பு நடந்த போது விபத்தில் சிக்கிய நடிகர் விஜய் ஆண்டனி தற்போது எப்படி இருக்கிறார் என்பதை அவரே தனது டுவிட்டர் பக்கத்தில் பதிவு செய்துள்ளார்.

விஜய் ஆண்டனி நடித்த ’பிச்சைக்காரன்’ என்ற திரைப்படம் மிகப்பெரிய வெற்றி பெற்ற நிலையில் அந்த படத்தின் இரண்டாம் பாகம் தற்போது உருவாகி வருகிறது. இந்த படத்தை விஜய் ஆண்டனி இயக்கி வரும் நிலையில் சமீபத்தில் இந்த படத்தின் படப்பிடிப்பு மலேசியாவில் நடைபெற்றது.

மலேசியாவில் மின்சார படகில் விஜய் ஆண்டனி செல்லும் காட்சியின் படப்பிடிப்பு நடைபெற்றுக் கொண்டிருந்தபோது திடீரென எதிர்பாராத விதமாக அவர் சென்ற மின்சார படகு விபத்துக்கு உள்ளானது. இதனை அடுத்து அவருக்கு படுகாயம் அடைந்த நிலையில் அவர் மலேசியாவில் உள்ள மருத்துவமனையில் சிகிச்சை பெற்றார். பின்னர் சென்னை திரும்பி அவர் தனியார் மருத்துவமனையில் தற்போது சிகிச்சை பெற்று வருகிறார்.

இந்த நிலையில் மலேசியாவில் ’பிச்சைக்காரன் 2’ படத்தின் படப்பிடிப்பு நடந்த போது தனக்கு மூக்கு மற்றும் தாடையில் காயம் ஏற்பட்டதாகவும் அதற்காக ஒரு மேஜர் ஆபரேஷன் செய்து முடித்துள்ளதாகவும் விஜய் ஆண்டனி தனது டுவிட்டர் பக்கத்தில் தெரிவித்துள்ளார். விரைவில் உங்கள் எல்லோரையும் வீடியோ மூலம் சந்திக்கிறேன், எனக்காக பிரார்த்தனை செய்த அனைத்து நல்ல உள்ளங்களுக்கும் எனது நன்றி என்றும் தெரிவித்துள்ளார்.

மேலும் விஜய் ஆண்டனி தான் சிகிச்சை பெற்று வரும் புகைப்படத்தையும் பதிவு செய்துள்ள நிலையில் அந்த புகைப்படம் வைரல் ஆகி வருகிறது. இந்த நிலையில் தயாரிப்பாளர் சுரேஷ் காமாட்சி, விஜய் ஆண்டனி விரைவில் குணமாக வாழ்த்து தெரிவித்துள்ளார்.
 

Get well soon bro ❤️ https://t.co/04Ch4X5mtG

— sureshkamatchi (@sureshkamatchi) January 25, 2023