110 பேர் வெற்றி: திமுக, அதிமுகவை அடுத்து மூன்றாவது இடம் விஜய்க்கா?
- IndiaGlitz, [Wednesday,October 13 2021]
தமிழகத்தில் நடைபெற்று முடிந்த ஊரக உள்ளாட்சி தேர்தலில் திமுக, அதிமுகவை அடுத்து அதிக வெற்றி பெற்றுள்ளது விஜய் மக்கள் இயக்கத்தின் நிர்வாகிகள் என்பதால் விஜய் மூன்றாவது இடத்தை பிடித்துள்ளாரா? என்ற விமர்சனம் அரசியல் விமர்சகர்கள் மத்தியில் எழுந்துள்ளது பெரும் பரபரப்பை ஏற்படுத்தி உள்ளது.
நடைபெற்று முடிந்த ஊரக உள்ளாட்சி தேர்தலில் ஆளும் கட்சியான திமுக அமோக வெற்றி பெற்றுள்ளது என்றும் அதனை அடுத்து அதிமுக வெற்றி பெற்றுள்ளது என்பதும் குறிப்பிடத்தக்கது. இந்த நிலையில் விஜய் மக்கள் இயக்கத்தினர் 169 பேர் இந்த தேர்தலில் போட்டியிட்டதாக அகில இந்திய விஜய் மக்கள் இயக்கத்தின் தலைவர் புஸ்ஸி ஆனந்த் நேற்று தெரிவித்திருந்தார் என்பது குறித்து ஏற்கனவே பார்த்தோம்.
இந்த நிலையில் நேற்றைய நிலவரப்படி விஜய் மக்கள் இயக்கத்தை சேர்ந்த 51 பேர் வெற்றி பெற்றிருந்த நிலையில் தற்போது வந்துள்ள தகவலின்படி 9 மாவட்ட ஊராட்சி தேர்தலில் விஜய் மக்கள் இயக்கத்தின் சார்பில் போட்டியிட்ட 169 பெயர்களில் 110 பேர் வெற்றி பெற்றதாக தகவல் வெளிவந்துள்ளது.
இதனை அடுத்து திமுக அதிமுகவை அடுத்து மூன்றாவது இடத்தை விஜய் மக்கள் இயக்கம் பெற்றுள்ளதாக கருதப்படுகிறது. விஜய் மக்கள் இயக்கத்தின் அனைத்து வேட்பாளர்களும் சுயேச்சையாக போட்டியிட்டதால் அவர்கள் சுயேட்சை என்ற பட்டியலில் வந்தாலும் விஜய் மக்கள் இயக்கத்தின் சார்பில் வெற்றி பெற்றவர்கள் என்று பார்த்தால் மூன்றாவது இடம் பிடித்து உள்ளதாக அரசியல் விமர்சகர்கள் கருத்து தெரிவித்து வருகின்றனர்.