பிரபல நடிகை சமந்தா கடந்த சில வாரங்களுக்கு முன்னர் மருத்துவமனையில் அனுமதிக்கப்பட்டு சிகிச்சை பெற்று வந்தார் என்பது தெரிந்ததே. அவருக்கு மிகவும் அரிதான மயோசிட்டிஸ் என்ற நோய் பாதிக்கப்பட்டுள்ளதாகவும் அதற்காக சிகிச்சை பெற்று வருவதாகவும் அவரே தனது இன்ஸ்டாகிராம் பக்கத்தில் கூறியிருந்தார். மேலும் தான் மெதுவாக குணமாகி வருவதாகவும் விரைவில் பூரண குணமாகி விடும் என்ற நம்பிக்கை இருப்பதாகவும் அவர் தெரிவித்தார்.

இந்த நிலையில் நேற்று திடீரென மீண்டும் ஹைதராபாத்தில் உள்ள தனியார் மருத்துவமனையில் சமந்தா அனுமதிக்கப்பட்டுள்ளதாக தெரிகிறது. அவர் மயோசிட்டிஸ் சிகிச்சைக்காக அனுமதிக்கப்பட்டிருக்கிறாரா? அல்லது வேறு ஏதும் பிரச்சனையா? என்ற விவரம் தெரியவில்லை.

சமந்தாவின் உடல்நிலை சற்று மோசமாக இருப்பதாக சமூகவலைதளங்களில் செய்தி பரவினாலும், சமந்தாவின் தரப்பிலிருந்தோ அல்லது மருத்துவமனை தரப்பில் இருந்தோ இன்னும் அவரது உடல்நிலை குறித்த விவரம் அதிகாரப்பூர்வமாக வெளியாகவில்லை என்பது குறிப்பிடத்தக்கது.

இந்த நிலையில் நடிகை சமந்தா விரைவில் குணமாக வேண்டும் என்று அவரது ரசிகர்கள் அவருக்கு வாழ்த்து தெரிவித்து வருகின்றனர். சமீபத்தில் வெளியான சமந்தாவின் ’யசோதா’ திரைப்படம் மிகப்பெரிய வரவேற்பை பெற்றுள்ளது என்பதும் இரண்டாவது வாரமாக அரங்கு நிறைந்த காட்சிகளாக திரையரங்குகளில் ஓடிக் கொண்டிருக்கிறது என்பது குறிப்பிடத்தக்கது.