ஹாட்ஸ்டாரில் 'லேபிள்’ என்ற வெப்தொடர் ஒவ்வொரு வெள்ளிக்கிழமையும் புதிய எபிசோடு வெளியாகி கொண்டிருக்கும் நிலையில் இந்த வார எபிசோடில் இயக்குனர் அருண்ராஜா காமராஜ், சரண்ராஜின் கேரக்டரில் திடீர் திருப்பத்தை ஏற்படுத்தி உள்ளார்.

ஏற்கனவே நான்கு எபிசோடுகள் வெளியாகி உள்ள நிலையில் நேற்று ஐந்தாவது எபிசோடு வெளியாகி உள்ளது. இதில் பாதாளம் என்ற ரவுடியை வட சென்னையை சேர்ந்த இருவர் லேபிளுக்காக போட்டு தள்ளி உள்ளனர். எனவே பாதாளம் ஆதரவாளர்கள் இருவரையும் போட்டு தள்ள முயற்சிக்கும் நிலையில் ஜெய் அவர்களை காப்பாற்றி சிறைக்கு அனுப்பி வைக்கிறார்.

இதனால் பாதாளம் ரவுடியை சேர்ந்தவர்கள் ஜெய் மீது குறி வைக்கின்றனர். குறிப்பாக திருவிழாவுக்கு சென்ற ஜெய்யின் அப்பா சரண்ராஜை போட்டுத்தள்ள சில ரெளடிகள் முயற்சித்தபோது, அவர் தன்னை தாக்க வந்த ரவுடிகளை ரவுண்டு கட்டி அடிக்கிறார். அதன் பிறகு தானே ஒரு லேபிள் என்று சரண்ராஜ் கூறுவது திடீர் திருப்பத்தை ஏற்படுத்தி உள்ளது.

மனைவிக்கு ஜாக்கெட் தைத்துக் கொடுக்கும் அப்பாவி நபராக அறிமுகம் செய்யப்பட்ட சரண்ராஜ், திடீரென லேபிள் என்று கூறுவது பரபரப்பை ஏற்படுத்தி உள்ளது. அதேபோல் நான்கு சிறுவர்கள் ஜெய்யை கொலை செய்ய முயற்சிப்பது, அவர் தப்பிப்பதும் த்ரில் காட்சிகள் ஆக உள்ளது.

ஐந்தாவது எபிசோடு இறுதியில் ஒரு திடீர் திருப்பத்தை இயக்குனர் கொடுத்துள்ளதால் அடுத்த வாரம் எபிசோட்டை எதிர்நோக்கும் ஆவலில் பார்வையாளர்கள் உள்ளனர். மொத்தத்தில் பரபரப்புக்கும் விறுவிறுப்புக்கும் பஞ்சமில்லாமல் லேபிள் தொடர் சென்று வருவதை அடுத்து இந்த தொடருக்கு நல்ல வரவேற்பு கிடைத்துள்ளது.