தளபதி விஜய் நடிப்பில், வெங்கட் பிரபு இயக்கத்தில், ஏஜிஎஸ் நிறுவனத்தின் தயாரிப்பில், யுவன் சங்கர் ராஜா இசையில் உருவாகி வரும் ‘கோட்’ திரைப்படத்தில் ஏற்கனவே ஒரு மிகப்பெரிய நட்சத்திரக் கூட்டம் நடித்து வரும் நிலையில் ஒரு சிலர் சிறப்பு தோற்றத்தில் நடித்து வந்தனர் என்பதை ஏற்கனவே பார்த்தோம்.

இந்த நிலையில் இந்த படத்தில் சிறப்பு தோற்றத்தில் நடிப்பவர்களின் எண்ணிக்கை தற்போது உயர்ந்து கொண்டே வருவதாக தகவல் வெளியாகி உள்ளன. முதல் கட்டமாக இந்த படத்தில் சிறப்பு தோற்றத்தில் நடிகை த்ரிஷா ஒரு பாடலுக்கு நடனமாடி இருப்பதாகவும் ஒரு சில காட்சிகளில் நடித்திருப்பதாகவும் கூறப்பட்டது. த்ரிஷாவும் இதனை தனது சமூக வலைத்தளத்தில் உறுதி செய்தார்.

இதனை அடுத்து இந்த படத்தில் கேப்டன் விஜயகாந்த் ஏஐ டெக்னாலஜி மூலம் சில காட்சிகள் வர இருப்பதாகவும் அதற்கு பிரேமலதா ஒப்புதல் கொடுத்ததாகவும் கூட செய்திகள் வெளியானது. எனவே நீண்ட இடைவெளிக்கு பின் கேப்டனை அவரது ரசிகர்கள் ‘கோட்’ படத்தின் மூலம் திரையில் காணலாம்..

மேலும் கடந்த இரண்டு நாட்களுக்கு முன்னால் இந்த படத்தில் சிவகார்த்திகேயன் சிறப்பு தோற்றத்தில் நடித்திருப்பதாகவும் விஜய் மற்றும் சிவகார்த்திகேயன் உரையாடல் காட்சி ஒன்று இந்த படத்தில் இருப்பதாகவும் கூறப்பட்டது.

அதுமட்டுமின்றி கடந்த சில மாதங்களுக்கு முன்னர் திருவனந்தபுரத்தில் இந்த படத்தின் படப்பிடிப்பு நடந்த போது கிரிக்கெட் சம்பந்தமான காட்சி படமாக்கப்பட்டதாகவும் அதில் சில கிரிக்கெட் வீரர்கள் நடித்ததாகவும் குறிப்பாக சென்னை சூப்பர் கிங்ஸ் வீரர்கள் சிலர் சிறப்பு தோற்றத்தில் நடித்ததாகவும் கூறப்பட்டது.

இந்த நிலையில் தற்போது வந்திருக்கும் தகவல் படி இயக்குனர் வெங்கட் பிரபுவும் சிறப்பு தோற்றத்தில் நடித்த காட்சிகள் வரும் வகையில் கதை அமைக்கப்பட்டுள்ளதாகவும் தெரிகிறது. வெங்கட் பிரபு இந்த படத்தில் சிறப்பு காட்சியில் தோன்றுவது நம்ம லிஸ்டிலேயே இல்லையே என்று ரசிகர்கள் தெரிவித்து வருகின்றனர்.

மொத்தத்தில் ஒரு மிகப்பெரிய நட்சத்திரக் கூட்டம் மற்றும் சிறப்பு தோற்றத்தில் தோன்றும் பிரபலங்கள் என ’கோட்’ திரைப்படம் பிரம்மாண்டத்தின் உச்சத்தை நோக்கி சென்று கொண்டிருக்கிறது.