நடிகை, பாடகி, இசையமைப்பாளர், டான்சர் என பல அவதாரங்களில் வலம்வரும் ஆண்ட்ரியாவுக்கு இன்று பிறந்தநாள். அவருக்கு நமது மனமார்ந்த பிறந்தநாள் நல்வாழ்த்துக்கள்

'கண்டநாள் முதல்' என்ற படத்தில் ஒரு சிறு கேரக்டரில் அறிமுகமான ஆண்ட்ரியா, கவுதம் மேனன் இயக்கிய 'வேட்டையாடு விளையாடு' என்ற படத்தில் இடம்பெற்ற ஒரு பாடலை பாடினார். பின்னர் அவருடைய அடுத்த படமான 'பச்சைக்கிளி முத்துச்சரம்' படத்தில் சரத்குமாருக்கு ஜோடியாக ஒரு வெயிட்டான கேரக்டரில் நடித்தார்.

இதன்பின்னர் செல்வராகவனின் 'ஆயிரத்தில் ஒருவன்', அஜீத்தின் 'மங்காத்தா', ஆகிய படங்களில் நடித்த ஆண்ட்ரியா உலக நாயகன் கமல்ஹாசனுடன் 'விஸ்வரூபம்' மற்றும் 'உத்தமவில்லன்' ஆகிய இரண்டு படங்களில் நடித்தார்.

ஜீவாவுடன் 'என்றென்றும் புன்னகை', சுந்தர் சி இயக்கிய 'அரண்மனை', ஆகிய வெற்றி படங்களிலும் ஆண்ட்ரியா நடித்துள்ளார். தற்போது ராம் இயக்கிவரும் 'தரமணி' உள்பட ஒருசில படங்களில் நடித்து வருகிறார்.

நடிகையாக மட்டுமின்றி சிறந்த பாடகியாகவும் விளங்கி வரும் ஆண்ட்ரியா, 'அந்நியன் படத்தில் இடம்பெற்ற 'கண்ணும் கண்ணும் நோக்கியா', 'ஆயிரத்தில் ஒருவன்' படத்தில் இடம்பெற்ற 'உன் மேல ஆசைதான்', 'பில்லா 2' படத்தில் மதுரைப்பொண்ணு உள்பட பல ஹிட் பாடல்களை பாடியுள்ளார்.

மேலும் 'தரமணி' படத்திற்காக ஒரு புரமோஷன் பாடலை கம்போஸ் செய்து, எழுதி பாடியும் உள்ளார். இவ்வாறு பல்வேறு திறமைகள் கொண்ட ஆண்ட்ரியா கோலிவுட் திரையுலகில் இன்னும் பல வெற்றிகளை குவிக்க இந்த பிறந்த நாளில் அவரை வாழ்த்துவோம்.