ஹரியாணா மாநில முதல்வர் மனோகர் லால் கட்டார் பெண் கல்வியை ஊக்கப்படுத்தும் விதத்தில் பெண்கள் பட்டப்படிப்பை முடிக்கும் போது அவர்களுக்கு பாஸ்போட்டையும் சேர்த்து வழங்க ஏற்பாடு செய்வோம் என்ற அறிவிப்பை வெளியிட்டு இருக்கிறார். பெண்கள் கல்லூரி படிப்பை முடிக்க வேண்டும், படிப்பு முடிந்தவுடன் வெறுமனே இருந்து விடக்கூடாது, அவர்கள் வெளிநாடுகளுக்கும் சென்று பணியாற்ற வேண்டும். இதற்கு கல்லூரி படிப்பை முடிக்கும்போதே அவர்களுக்கு பாஸ்போட் கிடைக்குமாறு வழிவகை செய்யப்படும் என்ற மகிழ்ச்சியான அறிவிப்பை வெளியிட்டு இருக்கிறார்.

கல்லூரி மாணவர்கள் வாகனங்களில் செல்லும் போது ஹெல்மெட் அணிந்து செல்ல வேண்டும் என்பதை வலியுறுத்தும் வகையில் நேற்று சண்டிகரில் விழிப்புணர்வு நிகழ்ச்சி நடைபெற்றது. அந்நிகழ்ச்சியில் கலந்து கொண்ட முதல்வர் மனோகர் லால் கட்டார், மாணவர்கள் வாகனங்களில் செல்லும்போது முறையாக ஹெல்மட் அணிந்து செல்ல வேண்டும். சாலை விதிமுறைகளை முறையாகக் கடைபிடிக்க வேண்டும். மேலும் பெண்கள் கல்விக்கு முக்கியத்துவம் தர வேண்டும். அவர்கள் படித்த முடித்து விட்டு வெளிநாடுகளுக்கும் சென்று பணியாற்ற வேண்டும்.எனவே கல்லூரி படிப்பை முடிக்கும் பெண்களுக்கு பட்டப்படிப்புடன் சேர்த்து பாஸ்போட்டையும் வழங்க ஏற்பாடு செய்யப்படும் எனத் தெரிவித்து இருக்கிறார். முதல்வரின் இந்த அறிவிப்பிற்கு ஹரியாணா மாநிலத்தில் நல்ல வரவேற்பு கிடைத்து இருக்கிறது என்பதும் குறிப்பிடத்தக்கது.