డిసెంబ‌ర్‌లో ప‌వ‌న్‌తో శ్రుతి..!
- IndiaGlitz, [Sunday,November 08 2020]
పవర్‌స్టార్ ప‌వ‌న్‌క‌ల్యాణ్ హీరోగా శ్రీరామ్ వేణు ద‌ర్శ‌క‌త్వంలో రూపొందుతోన్న చిత్రం ‘వకీల్‌సాబ్‌’. బోనీక‌పూర్‌, దిల్‌రాజు నిర్మాత‌లు. ఈ సినిమా చిత్రీక‌ర‌ణ ద‌శ‌లో ఉంది. ఈ షెడ్యూల్‌లో పవన్, ఇత‌ర తారాగ‌ణంపై చిత్రీక‌ర‌ణ ఉంటుంది. ఈ చిత్రంలో ప‌వ‌న్‌క‌ల్యాణ్ జోడీగా శ్రుతిహాస‌న్ క‌నిపించ‌నుంది. గ‌బ్బ‌ర్‌సింగ్‌, కాటమరాయుడు చిత్రాల తర్వాత పవన్, శ్రుతి క‌లిసి న‌టించే చిత్రమిదే అవుతుంది. ఇందులో శ్రుతి హాసన్ కాసేపే క‌నిపిస్తుంది. పవన్, శ్రుతి మ‌ధ్య ఉన్న స‌న్నివేశాల‌ను వ‌చ్చే నెల‌లో చిత్రీక‌రిస్తార‌ట. డిసెంబ‌ర్ నెల‌లో ప‌దిరోజుల షెడ్యూల్‌లో హీరో హీరోయిన్ మ‌ధ్య సన్నివేశాల చిత్రీక‌ర‌ణతో షూటింగ్ పూర్త‌వుతుంద‌ని స‌మాచారం.
స్టార్ హీరోయిన్ హోదాలో ఓ వెలుగు వెలిగిన క‌థానాయిక శృతి హాసన్. కాని గత ఏడాది కాలం నుంచి ఈమె న‌టించిన ఒక్క సినిమా కూడా ద‌క్షిణాదిలో విడుదల కాలేదు. తమిళంలో ‘ఎస్3’, తెలుగులో ‘కాటమరాయుడు’ సినిమాల తర్వాత శృతి.. దక్షిణాదిన దాదాపు కనుమరుగైపోయారు. ఈ క్రమంలో ఆమె ప్రేమ వివాహం చేసుకోబోతున్నట్టు, అందుకే సినిమాలకు దూరంగా ఉంటున్నట్టు కథనాలు వినిపించాయి. లవ్ బ్రేకప్ కావడంతో శృతిహాస‌న్ మ‌ళ్లీ సినిమాలు, మ్యూజిక్ కాన్‌స‌ర్ట్‌ల‌పై ఫోక‌స్ చేసింది. ఆ క్రమంలో ఈమె రెండు తెలుగు సినిమాలకు ఓకే చెప్పింది. అందులో ఒక‌టి ‘క్రాక్’ సినిమా కాగా.. మ‌రో చిత్రం ప‌వ‌న్‌క‌ల్యాణ్ ‘వకీల్‌సాబ్‌’.