சிம்புவின் 'மாநாடு' தொடங்கும் தேதி குறித்த தகவல்
- IndiaGlitz, [Saturday,June 08 2019]
சிம்பு நடிப்பில் வெங்கட்பிரபு இயக்கத்தில் உருவாகவிருக்கும் 'மாநாடு' படத்தின் ஆரம்பகட்ட பணிகள் கிட்டத்தட்ட முடிந்துவிட்டது. அடுத்து படப்பிடிப்பை ஆரம்பிக்க படக்குழுவினர் தயார் நிலையில் உள்ளனர்.
இந்த நிலையில் 'மாநாடு' படத்தின் முதல்கட்ட படப்பிடிப்பு வரும் 25ஆம் தேதி முதல் மலேசியாவில் தொடங்கவுள்ளது. இதற்காக விரைவில் சிம்பு, வெங்கட்பிரபு உள்பட படக்குழுவினர் அனைவரும் விரைவில் மலேசியா செல்லவுள்ளனர்.
அரசியல் த்ரில் திரைப்படமான இந்த படத்திற்காக நடிகர் சிம்பு சமீபத்தில் வெளிநாடு சென்று தனது உடல் எடையை குறைத்து திரும்பியுள்ளார். சுரேஷ் காமாட்சி தயாரிப்பில் யுவன்ஷங்கர் ராஜா இசையில் உருவாகியிருக்கும் இந்த படத்தில் நாயகி உள்பட படத்தில் நடிக்கும் நட்சத்திரங்கள் அனைவரும் தேர்வு செய்யப்பட்டுவிட்டதாகவும் படப்பிடிப்பு தொடங்குவதற்கு முன்னரே இதுகுறித்து அதிகாரபூர்வ தகவல் வெளிவரும் என்றும் கூறப்படுகிறது.