இயக்குனர் லோகேஷ் கனகராஜ் தனது ’லியோ’ படத்தின் ப்ரோமோஷனுக்காக பல பேட்டிகள் கொடுத்துக் கொண்டிருக்கும் நிலையில் ஸ்டார் ஸ்போர்ட்ஸ் தமிழ் சேனலுக்கு அளித்த பேட்டியில் பிரபலம் ஒருவர் பத்மினியின் காதல் கவிதை என்ற கவிதையை லோகேஷ் கனகராஜ் எழுதியிருக்கிறார் என்று சொல்ல, யார் பத்மினி என்று தொகுப்பாளி கேட்க, சத்தியமா பத்மினி யார் என்று எனக்கு தெரியாது என்று அதிர்ச்சியுடன் லோகேஷ் பதில் அளித்தார். பத்மினி பிரச்சனை கிளப்பியவர் நடிகர் ஆர்ஜே பாலாஜி என்பது குறிப்பிடத்தக்கது.

இதுகுறித்த வீடியோவில் ஆர்ஜே பாலாஜி கூறிய போது, ‘உன்னிடம் ஒரு கேள்வி கேட்கச் சொன்னார்கள், கேட்பதற்கு முன் மக்களுக்கு தெரியாத ஒரு விஷயத்தைச் சொல்ல வேண்டும் என்று ஆசைப்படுகிறேன். லோகேஷ் கனகராஜ் ஒரு நல்ல இயக்குனர் என்பது எல்லோருக்கும் தெரியும். ஆனால் அவர் ஒரு நல்ல கவிஞர். அவர் ஸ்கூல் படிக்கும் போதிலிருந்தே நிறைய கவிதை எழுதியுள்ளார், அவருக்கு கவிதைகள் எழுதுவது ரொம்ப பிடிக்கும். குறிப்பா லோகேஷ் எழுதிய பத்மினி என்ற காதல் கவிதை எனக்கு ரொம்ப பிடிக்கும், முடிந்தால் மக்களுக்கு அந்த கவிதையை படியுங்கள் என்று கூறியுள்ளார்.

இதனை அடுத்து லோகேஷ் கனகராஜ், ஆர்ஜே பாலாஜியை ‘அட பைத்தியமே’ என்று திட்ட, ’ இந்த வீடியோ பார்த்ததும் நான் அப்படி ஒரு கவிதையே எழுதவில்லை என்று சொல்லி இருப்பாய், உலக மக்கள் பத்மினி என்ற அந்த காதல் கவிதையை பார்ப்பதற்கான, கேட்பதற்கான நாள் விரைவில் வரும் என்று தெரிவித்தார். இதையடுத்து ‘யார் அந்த பத்மினி’ என்று தொகுப்பாளினி கேட்க, சத்தியமா பத்மினி யார் என்று எனக்கு தெரியாது, அந்த பெயரில் எனக்கு தெரிந்தவர்கள் யாரும் இல்லை’ என்று கூறினார்.

மேலும் ஆர்ஜே பாலாஜி, ’விக்ரம்’ திரைப்படம் வெளியாவதற்கு முந்தைய நாள் நாம் இருவரும் சந்தித்தோம், நள்ளிரவில் நடந்த அந்த சந்திப்பின்போது நீ மிகவும் பதட்டத்துடன் இருந்ததை நான் பார்த்தேன். ஆனால் அந்த படம் மிகப்பெரிய வெற்றி பெற்றது. ’விக்ரம்’ படத்தை விட ’லியோ’ திரைப்படம் மிகப்பெரிய வெற்றி பெற எனது வாழ்த்துக்கள் என்று கூறினார். இது குறித்த வீடியோ இணையத்தில் வைரல் ஆகி வருகிறது.