கடந்த ஆண்டு அதிக படங்களை வெளியிட்டவர் என்ற பெருமை பெற்ற விஜய்சேதுபதி, இந்த ஆண்டும் அவர் ஒப்பந்தமாகிவரும் எண்ணிக்கையை பார்க்கும்போது அதிக படங்களை வெளியிடுவார் என்று எதிர்பார்க்கப்படுகிறது. ஏற்கனவே விஜய்சேதுபதி நடிப்பில் 'புரியாத புதிர்', கவண், விக்ரம் வேதா, கருப்பன், 96, போன்ற படங்கள் தயாராகி வரும் நிலையில் தற்போது இளம் ஹீரோ ஒருவருடன் இணைந்து நடிக்க ஒப்பந்தமாகியுள்ளார்.

பிரபல நடிகர் கார்த்திக் மகனும், வளர்ந்து வரும் ஹீரோவுமான கவுதம் கார்த்திக் நடிப்பில் அறிமுக இயக்குனர் ஆறுமுக குமார் ஒரு படத்தை இயக்கவுள்ளார். இரண்டு ஹீரோக்கள் சப்ஜெக்ட் படமான இந்த படத்தில் தற்போது விஜய்சேதுபதி இணைந்துள்ளார். கவுதம் கார்த்திக் கல்லூரி மாணவனாகவும், விஜய்சேதுபதி பழங்குடி இனத்தலைவராகவும் இதில் நடிக்கவுள்ளனர். ஒரு மாணவனுக்கும், பழங்குடி இனத்தலைவருக்கும் இடையே நடக்கும் பிரச்சனைதான் இந்த படத்தின் கதை என்று கூறப்படுகிறது.

இன்று முதல் சென்னையில் இந்த படத்தின் படப்பிடிப்பு தொடங்கவுள்ளதாகவும், இந்த படத்தின் நாயகி தேர்வு நடைபெற்று வருவதாகவும், விரைவில் இதுகுறித்த அறிவிப்பு வெளிவரும் என்றும் இயக்குனர் ஆறுமுக குமார் கூறியுள்ளார்.