கோலிவுட் திரையுலகில் உருவாகி வரும் பிரமாண்ட படங்களில் கமலஹாசனின் ’இந்தியன் 2’ மற்றும் மணிரத்னம் அவர்களின் ’பொன்னியின் செல்வன்’ ஆகியவை என்பது தெரிந்ததே. இந்த இரண்டு படங்களின் படப்பிடிப்புகள் விறுவிறுப்பாக நடைபெற்று வந்த நிலையில் திடீரென கொரோனா வைரஸ் பாதிப்பு காரணமாக படப்பிடிப்பு நிறுத்தப்பட்டு உள்ளன.

இந்த நிலையில் இந்த இரண்டு படங்களுக்கும் பிரபல நடிகரின் நிறுவனம் ஒன்று கம்ப்யூட்டர் கிராபிக்ஸ் பணிகளை செய்து வருவதாகத் தகவல்கள் வெளிவந்துள்ளது. ‘இந்தியன் 2’ மற்றும் பொன்னியின் செல்வன் ஆகிய இரண்டு படங்களின் படப்பிடிப்பு தற்போது நடை பெறவில்லை என்றாலும் போஸ்ட் புரொடக்ஷன் பணிகள் நடைபெற்று வருகின்றன. இந்த படங்களின் கிராபிக்ஸ் காட்சிகளில் பணிகள் பிரபல பாலிவுட் நடிகர் அஜய் தேவ்கான் அவர்களின் VFX நிறுவனத்தில் நடைபெற்று வருவதாக அந்நிறுவனத்தின் சூப்பர்வைசர் தெரிவித்துள்ளார். ‘இந்தியன் 2’ மற்றும் பொன்னியின் செல்வன் படங்களின் கிராபிக்ஸ் பணிகள் விறுவிறுப்பாக நடைபெற்று வருவதாகவும் விரைவில் பணிகள் முடியும் என்றும் அவர்கள் தெரிவித்துள்ளனர்.

கொரோனா வைரஸ் பாதிப்பு காரணமாக பிறப்பிக்கப்பட்டுள்ள ஊரடங்கு உத்தரவு முடிந்த பின்னர் ‘இந்தியன் 2’ மற்றும் பொன்னியின் செல்வன் படங்களின் படப்பிடிப்பு தொடங்கும் என்றும் இரண்டு படங்களையும் லைக்கா நிறுவனம் தயாரித்து வருகிறது என்பதும் குறிப்பிடத்தக்கது.