అజిత్, అర్జున్.. మ‌రోసారి
- IndiaGlitz, [Tuesday,February 20 2018]
నటుడిగా, దర్శకుడిగా, నిర్మాతగా, రచయితగా, పంపిణీదారుడిగా.. ఇలా సినిమాకి సంబంధించిన ప‌లు విభాగాల్లో తనదైన ముద్ర వేసారు యాక్షన్ కింగ్ అర్జున్. కన్నడ కుటుంబంలో పుట్టి.. తమిళ సినిమాలతో పాపుల‌రైన అర్జున్.. తెలుగులో కూడా ప‌లు విజ‌య‌వంత‌మైన చిత్రాల్లో సందడి చేశారు. దాదాపు తొమ్మిది సంవత్సరాల గ్యాప్ త‌రువాత.. గత ఏడాది నితిన్ హీరోగా నటించిన 'లై' సినిమాతో మళ్ళీ తెలుగు ప్రేక్షకుల ముందుకు వచ్చారు అర్జున్.
ప్రస్తుతం స్టైలిష్ స్టార్ అల్లు అర్జున్ నటిస్తున్న 'నా పేరు సూర్య నా ఇల్లు ఇండియా' సినిమాలో అర్జున్ ఒక కీలక పాత్ర పోషిస్తున్నారు. అలాగే విశాల్ హీరోగా వస్తున్న 'అభిమన్యుడు' (తమిళంలో 'ఇరుంబుత్తిరై') చిత్రంలో ప్రతినాయకుడిగా నటిస్తున్నారు ఈ యాక్షన్ కింగ్. ఇదిలా ఉంటే.. అజిత్ కథానాయకుడిగా శివ దర్శకత్వంలో 'విశ్వాసమ్‌' పేరుతో ఓ సినిమా రూపొందుతున్న సంగ‌తి తెలిసిందే. నయనతార కథానాయికగా నటిస్తున్న ఈ సినిమాలో అర్జున్ ఓ కీలక పాత్ర చేయ‌నున్నాడ‌ని త‌మిళ‌నాట వార్త‌లు వినిపిస్తున్నాయి.
గతంలో అజిత్, అర్జున్ కలిసి నటించిన తమిళ చిత్రం 'మంగాత్తా' (తెలుగులో 'గ్యాంబ్లర్') మంచి విజ‌యం సాధించింది. మ‌రోసారి ఈ కాంబినేష‌న్ అల‌రిస్తుందేమో చూడాలి. దీపావళి కానుకగా విడుదల కానున్న ఈ సినిమా.. తెలుగులోనూ అనువాదం కానుంది.