சூப்பர் ஸ்டார் ரஜினிகாந்த் நடிக்கும் 'கபாலி' படத்தின் படப்பிடிப்பு கடந்த விநாயகர் சதூர்த்தி தினத்தன்று பூஜையுடன் தொடங்கியது என்பது அனைவரும் அறிந்ததே. பா,ரஞ்சித் இயக்கி வரும் இந்த படத்தில் ரஜினிக்கு ஜோடியாக ராதிகா ஆப்தேவும், மகளாக தன்ஷிகாவும் நடித்து வருகின்றனர். இந்த படத்தின் படப்பிடிப்பு சென்னையில் உள்ள ஸ்டுடியோவில் விறுவிறுப்பாக நடைபெற்று வருகிறது.

இந்நிலையில் இந்த படத்தில் தற்போது இன்னொரு நடிகையும் இணைந்துள்ளதாக கூறப்படுகிறது. 'மெட்ராஸ்' படத்தில் மேரி என்ற கேரக்டரில் நடித்த நடிகை ரித்விகா இந்த படத்தின் முக்கிய கேரக்டரில் நடித்து வருவதாகவும், அவரது நடிப்பை சூப்பர் ஸ்டார் ரஜினி பாராட்டியதாகவும் கூறப்படுகிறது. ரித்விகா ஏற்கனவே இயக்குனர் பாலாவின் 'பரதேசி' படத்திலும் நடித்தவர் என்பது குறிப்பிடத்தக்கது.

ரஜினிகாந்த், ராதிகா ஆப்தே, தன்ஷிகா, கிஷோர், கலையரசன், தினேஷ், ரித்விகா மற்றும் பலர் நடிப்பில் உருவாகி வரும் இந்த படத்திற்கு முரளி ஒளிப்பதிவும், பிரவீண் படத்தொகுப்பும் செய்கின்றனர். சந்தோஷ் நாராயண் இசையமைக்கும் இந்த படத்தை பெரும் பொருட்செலவில் கலைப்ப்புலி எஸ்.தாணு தயாரித்து வருகிறார்.