దిగ్గజ న‌టుడు కైకాల స‌త్యనారాయ‌ణ (86) ఆరోగ్య ప‌రిస్థితి అత్యంత విష‌మంగా ఉంది. ప్రస్తుతం అపోలో ఆసుప‌త్రిలో వెంటిలేట‌ర్‌పై ఆయనకు చికిత్స అందిస్తున్నారు. ఆయన ప్రస్తుతం పోస్ట్ కోవిడ్ సింప్టమ్స్‌తో బాధపడుతున్నారని అపోలో వర్గాలు హెల్త్ బులెటిన్‌లో తెలిపాయి. మల్టిపుల్ ఆర్గాన్స్ ఫెయిల్ అయ్యాయని.. చికిత్సకు కైకాల స్పందించడం లేదని వైద్యులు వెల్లడించారు.

కొద్దిరోజుల క్రితం ఆయ‌న ఇంట్లో జారిప‌డి హాస్పిట‌ల్‌లో చేరారు. చికిత్స అనంతరం కోలుకున్న ఆయన మ‌రోసారి అనారోగ్యంతో ఆసుప‌త్రిలో చేరారు. హీరోగా, క్యారెక్ట‌ర్ ఆర్టిస్టుగా, విలన్‌గా, క‌మెడియ‌న్‌గా ఇలా అన్నీ ర‌కాల ప్రాత‌ల‌ను పోషించి త‌న‌దైన గుర్తింపును సంపాదించుకున్నారు. నిర్మాతగానూ సినిమాలు రూపొందించారు కైకాల సత్యనారాయణ.

60 ఏళ్ల సినీ ప్రస్థానంలో పౌరాణిక, సాంఘిక, చారిత్రక, జానపద పాత్రలు చేశారు. ఆయన పోషించిన వైవిధ్యమైన పాత్రలకు గుర్తుగా కైకాలను నవరస నటనా సార్వభౌమ అనే బిరుదుతో అభిమానులు పిలుచుకుంటూ వుంటారు. రాజకీయాలపై ఆసక్తితో 1996లో మచిలీపట్నం నుంచి తెలుగుదేశం పార్టీ తరపున లోక్‌సభకు ఎన్నికయ్యారు.