ఒడిశాలోని బాలాసోర్ జిల్లాలో జరిగిన ఘోర రైలు ప్రమాదంలో దాదాపు 270 మందికి పైగా ప్రాణాలు కోల్పోగా.. 900 మందికి పైగా గాయపడ్డారు. అయితే మృతుల సంఖ్య పెరిగే అవకాశం వుందని రైల్వే వర్గాలు చెబుతున్నాయి. శిథిలాల తొలగింపు ముమ్మరంగా చేస్తూ వుండటంతో వాటి కింద చిక్కుకుపోయిన వారు ఒక్కొక్కరిగా బయటికొస్తున్నారు. వీరిలో ప్రాణాలు కోల్పోయిన వారు కొందరైతే, తీవ్రంగా గాయపడిన వారు మరికొందరు. అంతేకాకుండా రైలు బోగీల్లో మరో 500 మంది ప్రయాణీకులు చిక్కుకున్నట్లుగా సమాచారం. మరోవైపు క్షతగాత్రులకు మెరుగైన చికిత్స అందించేందుకు ఒడిషా ప్రభుత్వం యుద్ధ ప్రాతిపదికన చర్యలు తీసుకుంది. రాష్ట్ర ముఖ్యమంత్రి నవీన్ పట్నాయక్, బెంగాల్ సీఎం మమతా బెనర్జీలు ఇప్పటికే సమీక్షలు నిర్వహించి బాధితులకు అండగా నిలుస్తున్నారు.

కేంద్రం ఉన్నత స్థాయి సమీక్ష:

అటు కేంద్ర ప్రభుత్వం సైతం వేగంగా స్పందించింది. రైల్వే మంత్రి అశ్విని వైష్ణవ్‌ ద్వారా వివరాలు తెలుసుకున్న ప్రధాని నరేంద్ర మోడీ ఉన్నత స్థాయి సమీక్ష నిర్వహించారు. ఈ నేపథ్యంలో ఆసుపత్రుల్లో క్షతగాత్రులను పరామర్శించేందుకుక ఆయన ఒడిషా వెళ్లనున్నారు. కటక్ ఆసుపత్రిలో చికిత్స పొందుతున్న బాధితులను మోడీ పరామర్శించనున్నారు. దీనితో పాటు దుర్ఘటన జరిగిన ప్రాంతాన్ని కూడా ప్రధాని పరిశీలించే అవకాశాలు వున్నాయి. ఇప్పటికే ప్రమాదంలో మరణించిన వారికి రైల్వే శాఖ రూ.10 లక్షల ఎక్స్‌గ్రేషియా ప్రకటించగా.. తీవ్రంగా గాయపడిన వారికి రూ.2 లక్షలు, స్వల్పంగా గాయపడిన వారికి రూ.50 వేలు నష్టపరిహారం ప్రకటించారు.

ప్రమాదం ఎలా జరిగింది :

బెంగళూరు నుంచి హౌరాకు వెళ్తున్న బెంగళూరు- హౌరా సూపర్‌ఫాస్ట్ ఎక్స్‌ప్రెస్ బాలేశ్వర్ సమీపంలోని బహానాగా బజార్ స్టేషన్ వద్ద తొలుత పట్టాలు తప్పింది. దీంతో ఈ రైలుకు సంబంధించిన బోగీలు పక్కనే వున్న ట్రాక్‌పై పడ్డాయి. వాటిని షాలిమార్ - చెన్నై కోరమండల్ ఎక్స్‌ప్రెస్ అత్యంత వేగంగా ఢీకొట్టింది. దీంతో కోరమండల్ రైలుకు సంబంధించి 15 బోగీలు బోల్తా పడ్డాయి. అక్కడితో ఇది ముగియలేదు.. బోల్తా పడ్డ కోరమండల్ బోగీలను పక్కనున్న ట్రాక్‌పై దూసుకొచ్చిన గూడ్స్ రైలు ఢీకొట్టింది. ఇలా మూడు రైళ్లు ఒకదానితో ఒకటి ఢీకొట్టుకోవడంతో ప్రమాద తీవ్రత అనూహ్యంగా పెరిగింది.

ప్రమాదం విషయం తెలుసుకున్న రైల్వే, పోలీస్, రెవెన్యూ, ఫైర్ సిబ్బంది అప్రమత్తమయ్యారు. హుటాహుటిన ఘటనాస్థలికి చేరుకుని సహాయక చర్యలు ప్రారంభించాయి. బాలేశ్వర్, భువనేశ్వర్, భద్రక్, మయూర్‌బంజ్, కటక్‌లలోని ప్రభుత్వ , ప్రైవేట్ ఆసుపత్రులను తక్షణం అప్రమత్తం చేసి దాదాపు 115 అంబులెన్స్‌ల ద్వారా వందలాది మంది క్షతగాత్రులను ఆసుపత్రికి తరలించారు. అటు ఎస్టీఆర్ఎఫ్, ఎన్డీఆర్ఎఫ్ బృందాలు బోల్తా పడ్డ రైలు నుంచి పలువురి మృతదేహాలను బయటకు తీశాయి.

ప్రమాదం నేపథ్యంలో రైల్వే శాఖ హైల్ప్‌లైన్ నెంబర్లను ఏర్పాటు చేసింది.

ఒడిశా ప్రభుత్వం- 06782-262286.
రైల్వే హెల్ప్‌లైన్లు:
హౌరా 033-26382217;
ఖరగ్‌పూర్‌ 8972073925
బాలేశ్వర్‌ 8249591559;
చెన్నై 044-25330952

వాల్తేరు డివిజన్‌..

విశాఖ : 08912 746330, 08912 744619
విజయనగరం : 08922-221202, 08922-221206.

దక్షిణ మధ్య రైల్వే :

సికింద్రాబాద్‌ రైల్‌ నిలయం (040 27788516)
విజయవాడ రైల్వే స్టేషన్‌ (0866 2576924)
రాజమండ్రి రైల్వే స్టేషన్‌ (0883 2420541)
రేణిగుంట రైల్వే స్టేషన్‌ (9949198414)
తిరుపతి రైల్వే స్టేషన్‌ (7815915571)
నెల్లూరు రైల్వే స్టేషన్‌ (08612342028)