பிரபல இயக்குன சுந்தர் சியின் கனவுப்படங்களில் ஒன்றான 'சங்கமித்ரா' படத்தில் நடிக்கும் நடிகர், நடிகைகளின் தேர்வு விறுவிறுப்பாக நடைபெற்று வருகிறது. இதுவரை இந்த படத்தில் ஜெயம் ரவி, ஆர்யா, ஸ்ருதிஹாசன் ஆகியோர் நடிக்க ஒப்பந்தமாகியுள்ளனர்.

இந்நிலையில் இந்த படத்தில் ஹன்சிகா இன்னொரு நாயகியாக நடிக்க ஒப்பந்தமாகியுள்ளதாக செய்திகள் வெளிவந்துள்ளது. ஏற்கனவே சுந்தர் சி இயக்கத்தில் உருவான 'தீயா வேலை செய்யணும் குமாரு', 'அரண்மனை', 'அரண்மனை 2', 'ஆம்பள' ஆகிய படங்களில் நடித்துள்ள ஹன்சிகா ஐந்தாவது முறையாக அவருடன் இணைந்துள்ளார்.

மேலும் ஸ்ருதிஹாசன் மற்றும் ஹன்சிகா ஆகியோர் 'புலி' படத்திற்கு பின்னர் மீண்டும் ஒரே படத்தில் நடிக்கவுள்ளனர் என்பதும் குறிப்பிடத்தக்கது.

மிகப்பெரிய பட்ஜெட்டில் ஸ்ரீதேனாண்டாள் பிலிம்ஸ் தயாரிக்கும் இந்த படத்திற்கு ஆஸ்கார் நாயகன் ஏ.ஆர்.ரஹ்மான் இசையமைக்கின்றார்.