நடிகவேள் எம்.ஆர்.ராதாவின் கலையுலக வாரிசும், பிரபல வில்லன் மற்றும் குணசித்திர நடிகருமான ராதாரவிக்கு இன்று பிறந்த நாள். எந்த கேரக்டர் கொடுத்தாலும் ஊதித்தள்ளும் ஒரு முழுமையான பிறவிக்கலைஞனுக்கு இந்த பிறந்த நாள் இனிய நாளாக அமைய நமது நல்வாழ்த்துக்கள்.

ராதாரவி திரையுலகிற்கு வந்து 40 ஆண்டுகள் ஆகிறது. கடந்த 1976ஆம் ஆண்டே அவர் சில படங்களில் நடித்து வந்தாலும், அவருக்கு பேர் சொல்லும் வகையில் அமைந்த முதல் படம் கே.பாலசந்தரின் 'தண்ணீர் தண்ணீர்' படம் தான். அரசியல் நையாண்டி படமான இந்த படத்தில் அவர் சரிதாவின் கணவராக நடித்திருந்தார். ராதாவிக்கு அழுத்தமான வசனங்கள் கொடுத்ததுடன் அவர் நடிகவேளின் வாரிசு என்பதை நிரூபிக்க வைக்க எடுத்த கே.பாலசந்தரின் முயற்சி வெற்றியை தேடித்தந்தது.

ஆரம்பகாலத்தில் குணசித்திர வேடங்களில் நடித்த ராதாரவி பின்னர் ரஜினி, கமல் படங்கள் உள்பட பல படங்களில் வில்லனாக நடித்து தமிழ் சினிமாவின் சிறந்த வில்லன் நடிகர்களில் ஒருவர் என்ற பெயரை பெற்றார்.

உயிருள்ளவரை உஷா, வைதேகி காத்திருந்தாள் , உயர்ந்த உள்ளம் , சின்னத் தம்பி , பூவெளி , உழைப்பாளி, குரு சிஷ்யன், வீரன் வேலுத்தம்பி என தமிழ் திரையுலகில் பல வேடங்களில் தன் நடிப்பினை வெளிபடுத்தினார். சமீபத்தில் வெளியான உதயநிதியின் 'மனிதன்' படத்தில் அவரது நடிப்பு அந்த படத்தின் வெற்றிக்கு மிகப்பெரிய காரணம் என்றால் அது மிகையாகாது.

திரைப்படத்தில் மட்டுமின்றி 'திருவிளையாடல்', 'செல்லமே', ரங்க விலாஸ் போன்ற தொலைக்காட்சி தொடர்களிலும் ராதாரவி நடித்துள்ளார். மேலும் ஓரிரண்டு படங்களில் பின்னணி குரலும் கொடுத்துள்ளார். குறிப்பாக ஆடுகளம் படத்தில் பேட்டைக்காரனாக நடித்த நடிகர் ஜெயபாலனுக்கு டப்பிங் குரல் கொடுத்தது ராதாரவி என்பது குறிப்பிடத்தக்கது.

நடிப்பு மட்டுமின்றி அரசியலிலும் ஈடுபாடு கொண்ட ராதாரவி ஆரம்பத்தில் திமுக அனுதாபியாக இருந்தாலும் ஜெயலலிதாவின் அதிமுகவில் இணைந்தார். அவர் கடந்த 2001ஆம் ஆண்டு நடைபெற்ற தேர்தலில் சைதாப்பேட்டை தொகுதியில் அதிமுக வேட்பாளராக போட்டியிட்டு வெற்றி பெற்றார். இருப்பினும் ஜெயலலிதா மறைவிற்கு பின்னர் திமுகவில் தன்னை இணைத்து கொண்டார்.

நடிகர் சங்கத்தின் தலைவராகவும், பொதுச்செயலாளராகவும் பணியாற்றிய ராதாரவி கடந்த ஆண்டு நடைபெற்ற தேர்தலில் விஷால் அணியால் தோற்கடிக்கப்பட்டார். இருப்பினும் தேர்தலுக்கு பின் விஷால் அணியினர்களுடன் சமாதானம் ஆகியதோடு, விஷாலுடன் 'மருது' படத்தில் நடித்தார் என்பது குறிப்பிடத்தக்கது.

திரைத்துறையில் பல வெற்றிகள் பெற்ற ராதாரவி, இன்னும் பல வெற்றி படங்களில் நடித்து மக்களை மகிழ்விக்கும் பணியில் தொடர்ந்து ஈடுபட வேண்டும் என்று அவருக்கு மீண்டும் ஒருமுறை பிறந்த நாள் நல்வாழ்த்துக்களை தெரிவித்து கொள்கிறோம்.