తెలంగాణ పోరాట స్ఫూర్తితోనే ఏపీలో రౌడీలు, గూండాలతో పోరాడుతున్నానని జనసేన అధినేత పవన్ కల్యాణ్‌ తెలిపారు. హనుమకొండలో నిర్వహించిన విజయసంకల్ప సభలో పాల్గొని బీజేపీ అభ్యర్థులకు మద్దతుగా ప్రసంగించారు. ఏపీలో తన పోరాటానికి తెలంగాణ యువత అండగా ఉంటోందన్నారు. వచ్చే ఏడాది నుంచి ఆంధ్రాలో ఎలా తిరుగుతున్నానో తెలంగాణలో కూడా అలాగే తిరుగుతానని స్పష్టం చేశారు. తెలంగాణ ఇచ్చిన స్ఫూర్తితోనే పదేళ్లుగా పార్టీ నడుపుతున్నానని..

బలిదానాలపై ఏర్పడిన రాష్ట్రం అవినీతిమయం కావడం బాధ కలిగించిందన్నారు. తెలంగాణకు మద్దతు ఇచ్చిన వారిలో తాను ఒకడిని అని పేర్కొన్ఆనరు. తెలంగాణలో దళిత ముఖ్యమంత్రిని చూడలేకపోయాం. బీసీ ముఖ్యమంత్రినైనా చూడాలని బీజేపీతో చేతులు కలిపానని చెప్పారు. తనకు ఆంధ్రా జన్మనిస్తే.. తెలంగాణ పునర్జన్మ ఇచ్చిందన్నారు. కమలం గుర్తుకు ఓటు వేసి రావు పద్మ, ఎర్రబెల్లి ప్రదీప్‌రావును గెలిపించాలని ఓటర్లకు పవన్‌ కల్యాణ్ విజ్ఞప్తి చేశారు.

ఈ మూడు, నాలుగు రోజులు వివిధ నియోజకవర్గాల్లో జనసేన, బీజేపీ అభ్యర్థులకు మద్దతుగా జనసేనానిన ప్రచారం చేయనున్నారు. అలాగే ప్రధాని మోదీ పాల్గొనే బహిరంగసభలు, రోడ్ షోల్లోనూ పవన్‌ పాల్గొననున్నారు. కాగా తెలంగాణలో బీజేపీ, జనసేన కలిసి పోటీ చేస్తున్న సంగతి తెలిసిందే. బీజేపీతో పొత్తులో భాగంగా జనసేన 8 స్థానాల్లో పోటీ చేస్తుండగా.. 111 స్థానాల్లో పోటీ చేస్తున్న బీజేపీకి మద్దతు ఇస్తోంది.