10 ஆண்டுகளுக்கு முன்பு கண்டுபிடிக்கப்பட்ட பெரிய அளவிலான மர்ம முட்டை குறித்து விஞ்ஞானிகள் எந்தத் தகவலும் தெரியாமல் விழித்து வந்தனர். பார்ப்பதற்கு காற்று வெளியேறிய கால்பந்து போலவே அந்த முட்டையும் இருந்ததாகக் கூறப்படுகிறது. இத்தனை வருடங்களும் இது எந்த விலங்கினத்தின் முட்டை. எந்த நூற்றாண்டை சேர்ந்தது என்ற குழப்பம் நீடித்து வந்தது. தற்போது இந்தக் குழப்பத்தை அமெரிக்க விஞ்ஞானிகள் தீர்த்து வைத்து இருக்கின்றனர் என்று பிபிசி செய்தி வெளியிட்டு இருக்கிறது.

68 மில்லியன் ஆண்டுகளுக்கு முன்பு வாழ்ந்த ஒரு பெரிய கடல் ஊர்வன விலங்கின் முட்டையாக இருக்கலாம் என்ற முடிவினை தற்போது ஆய்வாளர்கள் வெளியிட்டு உள்ளனர். இதுவரை நாம் பார்த்த முட்டை வடிவத்தில் இது மிகவும் பெரிது எனவும் கூறப்படுகிறது. கடந்த 2011 ஆம் ஆண்டு சிலி நாட்டின் கடற்கரை பகுதியில் இந்த முட்டை கண்டுபிடிக்கப் பட்டது என்பதும் குறிப்பிடத்தக்கது. முதலில் முட்டை என்று விஞ்ஞானிகள் கருதவில்லை. 2018 இல்தான் இது ஒரு முட்டை என்பதையே விஞ்ஞானிகளால் ஊகிக்க முடிந்தது. மேலும் இந்த முட்டையை ஈன்ற உயிரினம் சுமார் 7 மீட்டர் நீளம் கொண்டிருக்கலாம் எனவும் விஞ்ஞானிகள் குறிப்பிட்டு உள்ளனர்.