தேமுதிக தலைவரும் பிரபல நடிகருமான விஜயகாந்த மகன் விஜயபிரபாகரனுக்கும் கோவை தொழிலதிபர் மகள் கீர்த்தானவுக்கும் விரைவில் திருமணம் நடைபெற உள்ளதாக புகைப்படங்களுடன் கூடிய செய்தி வெளியாகியுள்ளது.

விஜயகாந்தின் மூத்த மகன் விஜய பிரபாகரனுக்கும் கோவை மாவட்டம் பெரிய நாயக்கன்பாளையம் என்ற பகுதியை சேர்ந்த தொழிலதிபர் இளங்கோ மகள் கீர்த்தனாவுக்கும் திருமணம் பேசி முடிக்கப்பட்டுள்ளது. இதுகுறித்த நிகழ்ச்சி ஒன்றில் கலந்து கொள்ள நேற்று பிரேமலதா விஜயகாந்த் மற்றும் விஜயபிரபாகரன் ஆகியோர் கோவை வந்தனர். பின்னர் சிங்காநல்லூரில் உள்ள உறவினர் வீட்டில் பெண் பார்த்து பூ வைக்கும் நிகழ்வு நடைபெற்றது.

மிகவும் எளிமையாக நடைபெற்ற இந்த நிகழ்ச்சியில் இரு வீட்டாரின் நெருங்கிய உறவினர்கள் மட்டுமே கலந்து கொண்டனர் என்பதும் உடல்நிலை காரணத்தால் விஜயகாந்த் கூட இந்த நிகழ்ச்சியில் கலந்து கொள்ளவில்லை என்பதும் குறிப்பிடத்தக்கது. இருப்பினும் இந்த நிகழ்ச்சியில் விஜயகாந்தின் மைத்துனர் எல்.கே.சுதீஷ் கலந்து கொண்டு நிகழ்ச்சிக்கு தேவையான அனைத்து ஏற்பாடுகளையும் செய்தார் என்பது குறிப்பிடத்தக்கது.