చంద్రబాబుకు మరో ఊహించని షాక్.. బీజేపీలోకి కీలకనేత!
Send us your feedback to audioarticles@vaarta.com
ఆంధ్రప్రదేశ్ ఎన్నికల ఫలితాల అనంతరం టీడీపీకి పరిస్థితులు అనుకూలించట్లేదు. ఎన్నికల్లో ఘోరంగా పరాజయం పాలైన తర్వాత ఒక్కొక్కరుగా కీలక నేతలు, రాజకీయ ఉద్ధండులంతా పార్టీని వీడుతున్నారు. ఇప్పటికే నలుగురు రాజ్యసభ సభ్యులు టీడీపీకి టాటా చెప్పి బీజేపీలో చేరడంతో కోలుకోలేని ఎదురుదెబ్బ తగిలినట్లైంది. మరోవైపు అదే బాటలో మరికొందరు ఎంపీలు, ఎమ్మెల్యేలు సైతం ఉన్నారన్న ప్రకటన టీడీపీని కలవరపెడుతోంది. ఓ వైపు టీడీపీ అధినేత విదేశీ పర్యటనలో ఉన్నప్పుడు ఇలా వరుస షాక్లు తగులుతుండటం.. ఎప్పుడెవరు ఏ పార్టీలోకి జంప్ అవుతారో అర్థం కాని పరిస్థితి నెలకొంది.
తాజాగా పశ్చిమ గోదావరి జిల్లా ఏలూరుకు చెందిన ప్రముఖ వ్యాపారవేత్త, సీనియర్, కీలక నేత అంబికా కృష్ణ రూపంలో మరో ఊహించని షాక్ ఎదురైంది. సోమవారం ఢిల్లీలో బీజేపీ కీలక నేతల్లో ఒకరైన రామ్మాధవ్ సమక్షంలో అంబికా బీజేపీ తీర్థం పుచ్చుకోనున్నారు. ఆయనతో పాటు సోదరుడు అంబికా రాజా కూడా పార్టీ మారేందుకు రంగం సిద్ధం చేసుకున్నట్లు తెలుస్తోంది. కాగా.. టీడీపీ ప్రభుత్వం హయాంలో ఏపీ ఫిల్మ్, థియేటర్, టెలివిజన్ కార్పొరేషన్ ఛైర్మెన్గా అంబికా కృష్ణ కొనసాగిన విషయం విదితమే. వైసీపీ ప్రభుత్వం ఏర్పడిన అనంతరం ఏపీఎఫ్డీసీకి ఇటీవలే ఆయన రాజీనామా చేశారు. రాజకీయ నేతలతో పాటు సినీ పరిశ్రమతో కూడా అంబికా కృష్ణకు సన్నిహిత సంబంధాలున్నాయన్న విషయం తెలిసిందే.
ఇదిలా ఉంటే.. ఇప్పటికే టీడీపీకి ఆర్థికంగా అండగా ఉన్న సుజనా చౌదరి, సీఎం రమేష్ పార్టీకి గుడ్ బై చెప్పగా.. తాజాగా ప్రముఖ పారిశ్రామిక వేత్తగా, పార్టీకి అండగా అంబికా కూడా జంప్ అవ్వడంతో టీడీపీకి కోలుకోలేని ఎదురుదెబ్బేనని విశ్లేషకులు చెబుతున్నారు. విదేశీ పర్యటన ముగించుకుని చంద్రబాబు అమరావతికి రాబోతున్నారు. అయితే చంద్రబాబు వచ్చాక పరిణామాలు ఎలా ఉంటాయో..? ఎంతమందిని పార్టీ మారకుండా ఆయన నిలువరిస్తారో వేచి చూడాల్సిందే మరి.
Follow @ Google News: గూగుల్ న్యూస్ పేజీలోని ఇండియాగ్లిట్జ్ తెలుగు వెబ్సైట్ను అనుసరించడానికి మరియు వెంటనే వార్తలను తెలుసుకోవడాని ఇక్కడ క్లిక్ చేయండి.