బాల రాముడిగా

బాల్యంలోనే ఎన్టీఆర్ నటుడిగా ఓనమాలు దిద్దుకున్నాడు. 1996లో బాలరామాయణంలో రాముడి పాత్రలో అందరినీ మెప్పించాడు.

తొలి ప్రయత్నం నిరాశే

ఇక హీరోగా తన కెరీర్ ప్రారంభించడానికి ఎన్టీఆర్ ఎక్కువ సమయం తీసుకోలేదు. నూనూగు మీసాల వయసులోనే 'నిన్ను చూడాలని' అనే చిత్రంతో హీరోగా పరిచయం అయ్యాడు. విఆర్ ప్రతాప్ దర్శత్వంలో తెరకెక్కిన ఆ చిత్రం నిరాశనే మిగిల్చింది.

స్టూడెంట్ నెం 1 గా

ఆ తర్వాత రాజమౌళి దర్శత్వంలో తెరకెక్కిన స్టూడెంట్ నెం 1 చిత్రం ఎన్టీఆర్ కు తొలి విజయాన్ని అందించింది. ఇక్కడి నుంచే ఎన్టీఆర్ జైత్ర యాత్ర మొదలైందని చెప్పాలి.

ఇండస్ట్రీని షేక్ చేస్తూ..

స్టూడెంట్ నెం 1 తో తొలి విజయం రుచి చూసిన ఎన్టీఆర్ ఇక రెచ్చిపోయాడు. వివి వినాయక్ దర్శత్వంలో తెరకెక్కిన ఆది ఘనవిజయంగా నిలిచింది. ఈ కుర్రాడిలో టన్నుల కొద్దీ సత్తా ఉందని అందరికీ తెలిసేలా చేసింది. మరోసారి ఎన్టీఆర్ తో రాజమౌళి చేతులు కలిపాడు. వీరిద్దరి రెండవ కాంబోలో వచ్చిన సింహాద్రి ఇండస్ట్రీని షేక్ చేస్తూ అఖండ విజయం అందుకుంది. ఇంకేముంది ఎన్టీఆర్ టాప్ లీగ్ లోకి దూసుకుపోయాడు.

కొన్ని పరాజయాలు

సింహాద్రి తర్వాత ఎన్టీఆర్ కు కొన్నేళ్ల పాటు కలసి రాలేదు. కొన్ని ఫ్లాప్ చిత్రాలు ఎదురయ్యాయి. కృష్ణ వంశీ దర్శత్వంలో వచ్చిన రాఖీ చిత్రం కంటెంట్ పరంగా ఒకే అనిపించింది. కానీ ఎన్టీఆర్ లుక్స్ విషయంలో విమర్శలు వచ్చాయి.

మళ్ళీ రాజమౌళినే

ఎన్టీఆర్ కెరీర్ ట్రాక్ తప్పుతోంది అనుకుంటున్న తరుణంలో సరైన సమయంలో మరోసారి రాజమౌళి వచ్చాడు. లుక్స్ పరంగా ఎన్టీఆర్ ని కంప్లీట్ గా మార్చేశాడు. సరికొత్త గెటప్ తో యమదొంగలో ఎన్టీఆర్ చెలరేగిపోయి నటించాడు. యమదొంగ చిత్రం తర్వాత తన తాతయ్య ఎన్టీఆర్, బాబాయ్ బాలయ్య తరహాలో జూ. ఎన్టీఆర్ కూడా పౌరాణిక, జానపద చిత్రాల్లో నటించాలనే డిమాండ్ అభిమానుల్లో బలంగా పెరిగింది.

పక్కా ప్లానింగ్ తో

యమదొంగ తర్వాత ఎన్టీఆర్ పక్కా ప్లానింగ్ తో తన కెరీర్ ముందుకు నడిపిస్తున్నాడు. కథల ఎంపికలో పరిపక్వత చూపిస్తున్నాడు. లుక్స్ పరంగా కేర్ తీసుకుంటూ పర్ఫెక్ట్ ఫిజిక్ మైంటైన్ చేస్తున్నాడు.

ఎలాంటి పాత్ర అయినా రెడీ

జై లవకుశ, అరవింద సమేత, టెంపర్ లాంటి చిత్రాలు గమనిస్తే తనకు ఎంతటి ఛాలెంజింగ్ రోల్ అయినా వెన్నతో పెట్టిన విద్య అన్న తరహాలో ఎన్టీఆర్ దూసుకుపోతున్నాడు.

తదుపరి లక్ష్యం పాన్ ఇండియా

ప్రస్తుతం ఎన్టీఆర్ రాజమౌళి దర్శత్వంలో ఆర్ఆర్ఆర్ లో నటిస్తున్న సంగతి తెలిసిందే. దేశం మొత్తం ఎదురుచూస్తున్న ఈ మూవీలో ఎన్టీఆర్ కొమరం భీంగా నటిస్తున్నాడు. ఈ చిత్రం ఎలాగు ఎన్టీఆర్ కి పాన్ ఇండియాలో క్రేజ్ తెచ్చిపెడుతుంది. అందుకే ఎన్టీఆర్ తన తదుపరి ప్రాజెక్ట్స్ ని పాన్ ఇండియా లెవల్ లో ప్లాన్ చేసుకుంటున్నాడు.

ఎన్టీఆర్ తన కెరీర్ లో మరిన్ని మైలురాళ్లు అందుకోవాలని కోరుకుంటూ అతడికి ఇండియా గ్లిట్జ్ టీమ్ జన్మదిన శుభాకాంక్షలు తెలుపుతోంది.