మెగాస్టార్ చిరంజీవికి అత్యంత నచ్చిన సినిమాల్లో ఒకటి మలయాళ సినిమా ‘లూసిఫర్’. ఈ చిత్రంలో మోహన్ లాల్ పాత్రతో పాటు కథా కథనం అన్నీ చిరును బాగా ఆకట్టుకున్నాయి. దీంతో ఈ సినిమాను రీమేక్ చేసే ఆలోచనలో మెగాస్టార్ ఉన్నట్టు తెలిసిందే. ‘ఆచార్య’ షూటింగ్ పూర్తవగానే ఆ సినిమాను పట్టాలెక్కించాలని చిరు భావిస్తున్నట్టు సమాచారం. ఈ లోగా ప్రి ప్రొడక్షన్ వర్క్ అంతా కంప్లీట్ కావాలి. కానీ దర్శకుడి విషయంలో కాస్త కన్ఫ్యూజన్ కొనసాగుతోంది.

అయితే మలయాళానికి ఏమాత్రం తీసిపోకుండా.. రీమేక్ చేయగలిగే దర్శకుడి కోసం చిరు చూస్తున్నట్టు తెలుస్తోంది. డైరెక్టర్ బాబీ, సుజిత్ వంటి వారు స్ర్కిప్ట్‌పై వర్క్ చేసినా వారు మాత్రం చిరును ఆకట్టుకోలేకపోయారని సమాచారం. ఆ తరువాత వి.వి. వినాయక్ పేరు వినిపించినప్పటికీ ఆయన తరువాత ఈ ప్రాజెక్ట్ నుంచి తప్పుకున్నట్టు వార్తలొస్తున్నాయి. దీంతో చిరు హరీష్ శంకర్‌తో ఈ సినిమాను చేయాలని భావిస్తున్నట్టు తెలుస్తోంది.

కాగా.. హరీష్ మాత్రం పవర్ స్టార్ పవన్ కల్యాణ్ కోసం ఎదురు చూస్తున్నారని తెలుస్తోంది. అయితే పవన్ ఇప్పటికే ‘వకీల్ సాబ్’ షూటింగ్‌లో ఉన్న విషయం తెలిసిందే. ఈ సినిమా షూటింగ్ పూర్తవగానే క్రిష్ దర్శకత్వంలో నటించనున్నారు. దీంతో పవన్‌తో హరీష్ సినిమాకు టైం పట్టే అవకాశముందని తెలుస్తోంది. ఈ లోగా ‘లూసిఫర్‌’ను లైన్‌లో పెట్టాలని మెగాస్టార్ భావిస్తున్నారట. త్వరలోనే మెగాస్టార్.. హరీష్ శంకర్‌ను ‘లూసిఫర్’ కోసం సంప్రదించనున్నట్టు తెలుస్తోంది. దీనిపై అధికారిక సమాచారం వెలువడితే కానీ క్లారిటీ రాదు.