ఎన్నికల వేళ జనసేన పార్టీకి కోనసీమ జిల్లాలో భారీ షాక్ తగిలింది. రాజోలు నియోజకవర్గం పార్టీ ఇంచార్జ్ బొంతు రాజేశ్వరరావు పార్టీకి రాజీనామా చేశారు. ఆయనతో పాటు జనసేన సర్పంచ్ కాకర శ్రీనివాస్, ఇతర ముఖ్య నాయకులు కూడా గుడ్ బై చెప్పారు. అనంతరం తణుకులో‌ ముఖ్యమంత్రి వైఎస్ జగన్ మోహన్ రెడ్డి సమక్షంలో వైఎస్సార్‌సీపీలో చేరారు. దీంతో రాజోలులో జనసేన పార్టీకి నష్టం జరిగే అవకాశాలు ఉన్నాయి.

బొంతు రాజేశ్వరరావు ఉమ్మడి ఆంధ్రప్రదేశ్‌లో ఇరిగేషన్ ఇంజనీర్ ఇన్ చీఫ్‌గా పనిచేశారు. దివంగత ముఖ్యమంత్రి వైఎస్‌ రాజశేఖర్ రెడ్డికి సన్నిహితుడిగా పేరు గడించారు. అనంతరం జరిగిన రాజకీయ పరిణామాలతో ఆయన వైఎస్సార్‌సీపీలో చేరారు. 2014, 2019 ఎన్నికల్లో రాజోలు నుంచి ఎమ్మెల్యే అభ్యర్థిగా రెండుసార్లు పోటీచేసి ఓడిపోయారు. 2019 ఎన్నికల్లో రాజోలు నుంచి జనసేన తరపున గెలిచిన రాపాక వరప్రసాదరావుపై కేవలం 800 ఓట్ల తేడాతో ఆయన ఓడిపోవడం జరిగింది. అయితే జనసేన పార్టీ నుంచి గెలిచిన ఎమ్మెల్యే రాపాక వరప్రసాద్‌‌ వైఎస్సార్‌సీపీకి మద్దతు ఇచ్చారు.

దీంతో సీఎం జగన్ రాపాకకు ప్రాధాన్యం ఇవ్వడంతో బొంతు వర్గీయులు తీవ్ర ఆగ్రహంతో ఉండేవారు. వెంటనే ప్రభుత్వ సలహాదారు పదవితో పాటు పార్టీకి రాజీనామా చేసి జనసేన పార్టీలో చేరారు. 2024 ఎన్నికల్లో జనసేన పార్టీ తరఫున రాజేశ్వరరావు రాజోలు టికెట్ ఆశించారు. కానీ పార్టీ అధినేత పవన్ కల్యాణ్‌ రిటైర్డ్ ఐఏఎస్ దేవ వరప్రసాద్‌కు టికెట్ కేటాయించడంతో రాజేశ్వరరావు తీవ్ర అసంతృప్తికి గురయ్యారు. దీంతో జనసేన పార్టీకి రాజీనామా చేసి తిరిగి వైసీపీ కండువా కప్పుకున్నారు.

కాగా 2019 ఎన్నికల్లో జనసేన గెలిచిన ఏకైక ఎమ్మెల్యే స్థానం రాజోలు కావడం విశేషం. అయితే గెలిచిన అభ్యర్థి రాపాక వైసీపీకి మద్దతు ఇవ్వడంతో ఒక్క ఎమ్మెల్యే మద్దతు కూడా జనసేనకు లేకుండా పోయింది. దీంతో ఈసారి సిట్టింగ్ స్థానాన్ని నిలుపుకోవాలని పట్టుదలతో ఉంది. అలాగే వైసీపీ కూడా జనసేన స్థానంలో పాగా వేయాలని డిసైడ్ అయింది. వైసీపీ నుంచి గొల్లపల్లి సూర్యరావు పోటీ చేస్తున్నారు. దీంతో ఇక్కడ ఎన్నిక రసవత్తరంగా మారింది.