ஜெயம் ரவி நடிப்பில் சமீபத்தில் வெளியான 'போகன்' நல்ல வரவேற்பை பெற்றது மட்டுமின்றி வசூலிலும் திருப்திகரமாக அமைந்த படமாக இருந்த நிலையில் அவருடைய அடுத்தடுத்த படங்களின் பணிகள் விறுவிறுப்பாக நடைபெற்று வருகிறது.

இயக்குனர் விஜய் இயக்கத்தில் வித்தியாசமான வேடத்தில் ஜெயம் ரவி நடித்து வந்த 'வனமகன்' படத்தின் படப்பிடிப்பு நேற்றுடன் முடிந்துவிட்ட நிலையில் இன்று முதல் அவர் நடித்து வரும் இன்னொரு படமான 'டிக் டிக் டிக்' படத்தின் இரண்டாம் கட்ட படப்பிடிப்பு தொடங்குகிறது.

சென்னை ஏவிஎம் ஸ்டுடியோவில் இந்த படத்தின் படப்பிடிப்பு தொடர்ந்து 45 நாட்கள் நடைபெறவுள்ளதாகவும், இந்த படப்பிடிப்புடன் கிட்டத்தட்ட இறுதிக்கட்டத்திற்கு படம் வந்துவிடும் என்றும் படக்குழுவினர் கூறுகின்றனர்.

ஜெயம் ரவி, நிவேதா, ரமேஷ் திலக் உள்பட பலர் நடித்து வரும் 'டிக் டிக் டிக்' படத்தை 'நாய்கள் ஜாக்கிரதை', 'மிருதன்' படங்களை இயக்கிய சக்தி செளந்திரராஜன் இயக்கி வருகிறார். டி.இமான் இசையமைப்பில் உருவாகி வரும் இந்த படம் வரும் கோடை விடுமுறையில் வெளியாகும் என்று எதிர்பார்க்கப்படுகிறது.