కొన్ని ఊహించని సంఘటనల వల్ల ఎంతటి వారైనా ఇబ్బందులు పడాల్సిందే. దీని వల్ల మంచో, చెడో రెండూ జరగొచ్చు. అచ్చం ఇదే పరిస్ధితిని ఎదుర్కొంటోంది సర్కార్ వారి పాట చిత్ర యూనిట్. సూపర్‌స్టార్ మహేశ్ హీరోగా.. పరశురామ్ దర్శకత్వంలో తెరకెక్కుతున్న ఈ సినిమాలో కీర్తి సురేశ్ హీరోయిన్‌గా నటిస్తోంది. కోవిడ్ తగ్గుముఖం పట్టడం, ఆంక్షల ఎత్తివేత కారణంగా ఈ సినిమా షూటింగ్‌ను శరవేగంగా నిర్వహిస్తున్నారు. తొలుత సంక్రాంతికి రావాల్సిన సర్కారు వారి పాటను... ఆర్ఆర్ఆర్, రాధేశ్యామ్ వంటి బడా బడ్జెట్ సినిమాల కోసం వాయిదా వేయాల్సి వచ్చింది. చివరికి సమ్మర్ కానుకగా మే 12ని లాక్ చేశారు నిర్మాతలు.

ఇకపోతే.. ప్రేమికుల దినోత్సవం సందర్భంగా ఈ సినిమాలోని ఫస్ట్ సింగల్ ‘కళావతి’ సాంగ్‌ని విడుదల చేస్తామని మేకర్స్ అనౌన్స్ చేశారు. అందుకు ఏర్పాట్లు చేసుకుంటుండగా.. ఊహించని విధంగా కళావతి ఫుల్ సాంగ్ నెట్టింట్లో లీకైంది. దీంతో చిత్ర యూనిట్ ఉలిక్కిపడింది. దీంతో సోమవారం రావాల్సిన ఈ సాంగ్‌ని అభిమానుల కోసం ఈ రోజే విడుదల చేశారు. సిద్ శ్రీరామ్ పాడిన ఈ పాటకు అనంత్ శ్రీరామ్ సాహిత్యం అందించగా, తమన్ స్వరాలు సమకూర్చారు. మహేష్ కెరీర్‌లో 27వ సినిమాగా తెరకెక్కుతున్న సర్కార్ వారి పాటను... మైత్రి మూవీ మేకర్స్, 14 రీల్స్ ప్లస్, జి.మహేష్ బాబు ఎంటర్‌టైన్‌మెంట్ బ్యానర్స్ సంయుక్తంగా నిర్మిస్తున్నాయి. సుబ్బరాజు, వెన్నెల కిషోర్ కీలక పాత్రలు పోషిస్తున్నారు.

కాగా.. ‘‘కళావతి’’ లీకేజ్‌ ఘటనపై మ్యూజిక్ డైరెక్టర్ తమన్‌ ఎమోషనల్ అయ్యారు. తన హృదయం ముక్కలైందంటూ ఓ ఆడియోని ట్విటర్‌లో షేర్‌ చేశారు. ‘మనసంతా బాధగా ఉందని.. ఏం మాట్లాడాలో అర్థం కావడం లేదన్నారు. దాదాపు ఆర్నెళ్లుగా ఈ పాట కోసం ఎంతో కష్టపడ్డామని... ఈ పాట చిత్రీకరణ జరిగే సమయంలో ఎనిమిది మందికి కరోనా వచ్చిందని తమన్ తెలిపారు. అయినా సరే, తామంతా కలిసి మంచి సాంగ్‌ని ప్రేక్షకులకు అందించాలనే ఉద్దేశంతో కష్టపడి పనిచేశామని ఆయన పేర్కొన్నారు. త్వరలో మీ అందరికీ ఈ పాట వినిపించాలనుకున్నామని.. కానీ, ఒకడు అంత ఈజీగా దీన్ని లీక్‌ చేసేసి.. ఆన్‌లైన్‌లో పెట్టేశాడని తమన్ ఆవేదన వ్యక్తం చేశారు