బిగ్‌బాస్ సీజన్ 4లో మెహబూబ్ దిల్ సే చివరి వరకూ ఉండకపోయినా.. తన టాస్క్‌లు ఆడే విధానంతో పాటు.. అద్భుతమైన డ్యాన్స్‌లతో తాను ఉన్నంత కాలం మాత్రం బిగ్‌బాస్ హౌస్‌లో తనదైన ఒక ముద్రను వేశాడు. అందుకే అతను మెగాస్టార్ చిరంజీవి దృష్టిలో పడ్డాడు. ప్రస్తుతం ‘ఆచార్య’ సినిమాలో మెహబూబ్ ఛాన్స్ కొట్టేశాడని జోరుగా ప్రచారం జరుగుతోంది. కొరటాల శివ దర్శకత్వంలో మెగాస్టార్ హీరోగా ఈ చిత్రం తెరకెక్కుతోంది. కాగా.. ఇటీవల జరిగిన బిగ్‌బాస్ ఫినాలేలో కంటెస్టెంట్లు సొహైల్, మెహబూబ్‌, దివిలకు మెగాస్టార్ బంపర్ ఆఫర్లు ప్రకటించిన విషయం తెలిసిందే.

దివికి తన తదుపరి చిత్రంలో అవకాశం ఇస్తానని వెల్లడించగా.. సొహైల్‌కు అతని సినిమాలో అతిథి పాత్రలో నటిస్తానని చెప్పారు. అలాగే సొహైల్ కోసం తన ఇంటి నుంచి బిర్యానీ చేయించుకుని తీసుకొచ్చి ఇచ్చి మరీ సర్‌ప్రైజ్ చేశారు. అలాగే మెహబూబ్‌కు రూ.10 లక్షల ఆర్థిక సాయం అందించారు. దీనికి సంబంధించిన చెక్‌ను స్టేజిపైనే మెహబూబ్‌కు అందించారు. తాజాగా ‘ఆచార్య’లో నటించే అవకాశాన్ని కూడా మెహబూబ్‌కి కల్పించారని టాక్ నడుస్తోంది. ఇప్పటికే కొరటాల శివ మెహబూబ్ పాత్ర గురించి ఆలోచిస్తున్నట్టు టాక్ నడుస్తోంది. ఈ టాక్ నిజమైతే మెహబూబ్ దిల్ సే దశ తిరిగిపోయినట్టే.