కంటెంట్ న‌చ్చితే చాలు.. జయాపజయాలను, స్టార్ డమ్‌ని కూడా పట్టించుకోని క‌థానాయ‌కుడు విక్టరీ వెంకటేష్. స‌బ్జెక్ట్ డిమాండ్ చేస్తే.. మల్టీ స్టారర్ మూవీ చేయడానికి కూడా వెనకాడరాయ‌న‌. ఇప్ప‌టికే పవన్ కళ్యాణ్, మహేష్ బాబు లాంటి స్టార్ ల‌తో ఈ త‌ర‌హా సినిమాలు చేశారు వెంకీ. ఇప్పుడు మ‌రో స్టార్‌తో ఆయ‌న తెర‌ని పంచుకోవ‌డానికి సిద్ధ‌మ‌య్యార‌ని వార్త‌లు వినిపిస్తున్నాయి.

అయితే.. ఈ సారి తెలుగు స్టార్‌తో కాదు.. మ‌ల‌యాళ స్టార్ హీరోతో ఆయ‌న స్క్రీన్ షేర్ చేసుకోబోతున్నారు. కాస్త వివ‌రాల్లోకి వెళితే.. మ‌ల‌యాళ సూప‌ర్ స్టార్ మోహ‌న్‌లాల్ క‌థానాయ‌కుడిగా న‌టించ‌నున్న ఓ మ‌ల‌యాళ సినిమాలో ఓ కీల‌క పాత్ర చేసేందుకు వెంక‌టేష్ గ్రీన్ సిగ్న‌ల్ ఇచ్చార‌ని మాలీవుడ్‌లో వార్త‌లు వినిపిస్తున్నాయి.

ఇందులో త‌న పాత్ర వినూత్నంగా ఉండ‌డంతో వెంకీ వెంట‌నే ఓకే చెప్పార‌ని తెలిసింది. ఒక‌వేళ ఈ సినిమా కార్యరూపం దాలిస్తే.. వెంకీ అభిమానుల‌కు అది శుభ‌వార్తే. ఇప్ప‌టికే మోహ‌న్‌లాల్ చిత్రాల‌తో జ‌గ‌ప‌తిబాబు, శ్రీ‌కాంత్ మాలీవుడ్‌లోకి ఎంట‌ర్ అయ్యారు. మోహ‌న్‌లాల్‌, వెంకీ సినిమాకి సంబంధించిన అధికారిక వార్త త్వ‌ర‌లోనే వెల్ల‌డ‌వుతుంద‌ని మాలీవుడ్ వ‌ర్గాలు పేర్కొంటున్నాయి.