தமிழக முதல்வர் முக ஸ்டாலின் அவர்கள் இன்று காலை தேமுதிக தலைவர் விஜயகாந்த் வீட்டிற்கு சென்று அவரது உடல் நலம் விசாரித்தது ஊடகங்களிலும் சமூக ஊடகங்களிலும் வைரலாகி வருகிறது.

தமிழக முதல்வர் முக ஸ்டாலின் அவர்கள் இன்று காலையில் விஜயகாந்த் அவர்களின் வீட்டிற்குச் சென்று அவரது உடல் நலம் குறித்து விசாரித்தார். அவருடன் அமைச்சர் துரைமுருகன் மற்றும் ஆ ராசா எம்பி ஆகியோர் உடன் சென்றனர். விஜயகாந்த் வீட்டிற்கு சென்ற முதலமைச்சர் முக ஸ்டாலின் அவர்களை எல்கே சதீஷ் வரவேற்று அழைத்துச் சென்றார்.

விஜயகாந்த்துக்கு பொன்னாடை போர்த்திய முதல்வர் ஸ்டாலின், அவரது உடல் நலம் குறித்து அக்கறையுடன் விசாரித்தார். அப்போது விஜயகாந்தின் மகன் விஜய பிரபாகரன் உடன் இருந்தார் என்பது குறிப்பிடத்தக்கது. இந்த சந்திப்பு மரியாதை நிமித்த சந்திப்பு என்றும் அரசியல் ரீதியான சந்திப்பு இல்லை என்றும் கூறப்படுகிறது.

சமீபத்தில் நடந்த தேர்தலில் அமமுகவுடன் கூட்டணி வைத்திருந்த விஜயகாந்தின் தேமுதிக, திமுகவை கடுமையாக விமர்சனம் செய்து தேர்தல் பிரச்சாரம் செய்தது. ஆனால் அதை எல்லாம் மறந்துவிட்டு நட்பு முறையில் தற்போது முதல்வர் முக ஸ்டாலின் அவர்கள் விஜயகாந்தை நேரில் சந்தித்து உடல் நலம் விசாரித்துள்ளார் என்பது குறிப்பிடத்தக்கது.