యంగ్ రెబల్ స్టార్ ప్రభాస్, స్టార్ హీరోయిన్ పూజా హెగ్డే జంటగా నటిస్తున్న పాన్ ఇండియా మూవీ ‘రాధేశ్యామ్’. ఈ సినిమాలో ప్రభాస్, పూజాలు విక్రమాదిత్య, ప్రేరణ అనే పాత్రల్లో నటిస్తున్నారు. చాలా కాలం తర్వాత ప్రభాస్ పూర్తి స్థాయి లవ్ అండ్ రొమాంటిక్ ఎంటర్‌టైనర్‌లో నటిస్తున్నాడు. ఇప్పటి వరకూ ఈ సినిమా నుంచి రిలీజైన అప్‌డేట్స్ అన్నీ సినిమాపై అంచనాలు పెంచేవిగానే ఉన్నాయి. రాధాకృష్ణ కుమార్ దర్శకత్వంలో ఈ సినిమా తెరకెక్కుతోంది. ఈ సినిమా పూర్తి లవ్ అండ్ ఎంటర్‌టైనర్ కావడంతో యూత్‌లో మరింత ఆసక్తి పెరిగింది.

ప్రభాస్ నేషనల్ స్టార్‌గా గుర్తింపు తెచ్చుకోవడం.. ప్యాన్ ఇండియా మూవీగా ఈ సినిమా తెరకెక్కుతుండటంతో ఆయన ఇమేజ్‌ను ఈ చిత్రం మరింత పెంచే అవకాశం ఉంది. యూవీ కృష్ణంరాజు స‌మ‌ర్ప‌ణ‌లో గోపీకృష్ణా మూవీస్‌, యూవీ క్రియేష‌న్స్ బ్యాన‌ర్స్‌పై వంశీ, ప్రమోద్‌, ప్ర‌శీద ఈ చిత్రాన్ని నిర్మిస్తున్నారు. తెలుగు, హిందీ సహా కన్నడ, మలయాళ, తమిళ భాషల్లో సినిమా ప్రపంచ వ్యాప్తంగా విడుదల కానుంది. ఈ పీరియాడిక్ లవ్‌స్టోరి షూటింగ్ కూడా తుది దశకు చేరుకుంది. ఈ సినిమాకు సంబంధించి తాజాగా ఓ అప్‌డేట్ తెగ వైరల్ అవుతోంది.

ప్రభాస్ సంగతి పక్కనబెడితే ఈ సినిమాలో పూజా పాత్రేంటనేది ఆసక్తికరంగా మారింది. యూరప్‌ బ్యాక్‌డ్రాప్‌లో పీరియాడికల్‌ లవ్‌స్టోరీగా తెరకెక్కుతున్న ఈ చిత్రంలో డాక్టర్‌ ప్రేరణ పాత్రలో పూజా హెగ్డే కనిపించనుందని టాక్. ఓ ప్రమాదంలో గాయపడిన విక్రమాదిత్యకు హాస్పిటల్‌లో ప్రేరణ చికిత్స చేస్తుందట. ఆ సమయంలోనే విక్రమాదిత్య, ప్రేరణల ప్రేమకథ మొదలవుతుందట. ఈ చిత్రాన్ని ఈ ఏడాది జూలై 30న ప్రపంచ వ్యాప్తంగా ప్రేక్షకుల ముందుకు రావాల్సి ఉంది.