తెలంగాణ ఎన్నికల ప్రచారం హోరాహోరిగా సాగుతున్నాయి. బీజేపీ కూడా ప్రచారంలో దూసుకుపోతుంది. ఇప్పటికే ప్రధాని మోదీ, కేంద్ర హోంమంత్రి అమిత్ షా, ఇతర బీజేపీ సీనియర్ నేతలు ప్రచారం చేశారు. అయితే ఇంతవరకు ఆ పార్టీలో కీలక నేత, మాజీ స్టార్ హీరోయిన్‌ విజయశాంతి మాత్రం ఎక్కడా కనపడటం లేదు. కొంతకాలంగా ఆమె బీజేపీ నేతల తీరుపై గుర్రుగా ఉన్నారు. ఎప్పుడైతే రాష్ట్ర అధ్యక్షుడిగా బండి సంజయ్‌ని మార్చి కిషన్ రెడ్డిని నియమించారో అప్పటి నుంచి విజయశాంతి పార్టీ కార్యకలాపాలకు దూరంగా ఉంటున్నారు. అవకాశం దొరికినప్పుడల్లా పరోక్షంగా బీజేపీపై సెటైర్లు వేస్తూ ట్వీట్స్ చేస్తున్నారు. ఈ క్రమంలోనే ఆమె కాంగ్రెస్‌లోకి వెళ్లనున్నారనే ప్రచారం జోరందుకుంది. ఈ నేపథ్యంలో ఇప్పటివరకు ప్రకటించిన అభ్యర్థుల జాబితాలోనూ ఆమె పేరు ప్రకటించలేదు.

తాజాగా తెలంగాణ ఎన్నికల కోసం బీజేపీ హైకమాండ్ ప్రకటించిన స్టార్ క్యాంపెయినర్ల జాబితాలోనూ విజయశాంతి పేరు లేదు. సినీ గ్లామర్‌తో పాటు రాజకీయంగానూ ఫాలోయింగ్ ఉన్న విజయశాంతికి క్యాంపెయినర్ల జాబితాలో స్థానం కల్పించకపోవటం ఆమెను అవమానించడమే అని అభిమానులు ఆగ్రహం వ్యక్తం చేస్తున్నారు. మరోవైపు ఆమె కాంగ్రెస్‌లోకి వెళ్లేందుకు రెడీగా ఉన్నారని.. అందుకే బీజేపీ పెద్దలు ఆమెను పక్కనపెడుతున్నారని కమలం నేతలు అభిప్రాయపడుతున్నారు. దీంతో విజయశాంతి పార్టీ మారనున్నారనే ప్రచారానికి మరింత బలం చేకూరుతుంది.

స్టార్ క్యాపెంయినర్ల జాబితాలో మొత్తం 40 మంది నేతల పేర్లను బీజేపీ ప్రకటించింది. ప్రధానమంత్రి నరేంద్ర మోదీతో పాటు బీజేపీ జాతీయ అధ్యక్షుడు జేపీ నడ్డా, కేంద్ర మంత్రులు అమిత్‌షా, రాజ్‌నాథ్‌ సింగ్‌, నితిన్‌ గడ్కరీ, నిర్మలా సీతారామన్, స్మృతి ఇరానీతో పాటు యూపీ సీఎం యోగి ఆదిత్యనాథ్‌ వంటి అగ్ర నాయకులు తెలంగాణలో ప్రచారం చేయనున్నారు. ఇక తెలంగాణకు చెందిన కిషన్ రెడ్డి, బండి సంజయ్, ఈటల రాజేందర్, ధర్మపురి అర్వింద్, రాజాసింగ్‌తో పాటు ఏపీ రాష్ట్ర అధ్యక్షురాలైన పురందేశ్వరికి ఈ జాబితాలో చోటు కల్పించారు.

బీజేపీ స్టార్ క్యాంపెయినర్లు జాబితా..