దివంగత ప్రధాన మంత్రి, ఆర్ధిక సంస్కరణల పితామహుడు స్వర్గీయ పీవీ నరసింహారావు జయంతి సందర్భంగా ఆయనకు నివాళులర్పించారు జనసేన అధినేత పవన్ కల్యాణ్. ఈ సందర్భంగా ఆయన మంగళవారం ఓ ప్రకటన విడుదల చేశారు. కులాలను విడదీయలేదు.. వర్గవైషమ్యాలను రెచ్చగొట్టలేదు.. ప్రాంతీయ విద్వేషాలకు ఆజ్యం పోయలేదు.. గద్దెనెక్కాక లక్షల కోట్లు సంపాదించనూ లేదు... ఇదీ కదా ఆదర్శనాయకుడంటే అంటూ పీవీని ప్రశంసించారు. అందుకే ఆయనంటే తనకు అమితమైన గౌరవమని.. మాటల్లో చెప్పలేనంత అభిమానమని పవన్ అన్నారు. ఆయన జయంతి సందర్భంగా పీవీకి వినమ్రంగా అంజలి ఘటిస్తున్నానని జనసేనాని పేర్కొన్నారు.

దేశాన్ని సంక్షోభం నుంచి సుభిక్షం వైపుకి నడిపారు:

ఈ దేశాన్ని అభివృద్ధిపథాన నడిపించాలని తపించే ప్రతీ నాయకునికీ పీవీ నరసింహారావు ఆదర్శనీయులని ఆయన కొనియాడు. ఎంత ఒదిగి వున్నా.. ఆయనలోని రాజనీతిజ్ఞత ఆయనను విజయునిగా ఎంతో ఎత్తుకు తీసుకెళ్లిందని పవన్ గుర్తుచేశారు. స్వాతంత్ర ఉద్యమకారునిగా.. న్యాయవాదిగా.. పాత్రికేయునిగా.. శాసనసభ్యునిగా.. మంత్రిగా.. ముఖ్యమంత్రిగా.. ప్రధాన మంత్రిగా ఉమ్మడి ఆంధ్రప్రదేశ్ రాష్ట్రానికి, భారతదేశానికీ ఆయన చేసిన సేవలు ఎంత కొనియాడినా తక్కువేనన్నారు. దేశం ఆర్థికంగా తీవ్రమైన ఒడిదుడుకులకు గురవుతున్న తరుణంలో దేశ ప్రధానిగా బాధ్యతలు చేపట్టి, లైసెన్స్ రాజ్ ను నిర్మూలించి, ఆర్థిక సంస్కరణలను ప్రవేశపెట్టి ఈ దేశాన్ని సంక్షోభం నుంచి సుభిక్షం వైపు నడిపించారని పవన్ కల్యాణ్ కొనియాడారు.

17 భాషల్లో నిష్ణాతుడు:

ఆయన పరిపాలన దక్షత, రాజకీయ చతురత అసమాన్యమని... ముందస్తు కార్యాచరణ లేకుండా ఆయన ఎన్నడూ చట్టసభలకు హాజరుకాలేదని జనసేనాని గుర్తుచేశారు. కవి, పండితుడే గాకుండా పదిహేడు భాషలలో పీవీ ప్రావీణ్యుడంటే ఆయన మేధో సంపత్తి ఏపాటిదో మనకు అవగతమవుతుందని పవన్ కల్యాణ్ పేర్కొన్నారు. ఇలా చెప్పుకొంటూపోతే ఆయన ప్రజ్ఞాపాటవాలు తరగనివి.. చెరగనివి అని అన్నిటికంటే ఆయన మన తెలుగువానిగా తెలంగాణ గడ్డపై జన్మించడం తెలుగు ప్రజలు చేసుకున్న సుకృతమన్నారు. ఆ పుంభావ సరస్వతికి, పరిపాలనా దిగ్గజానికి నా పక్షాన, జనసేన పార్టీ పక్షాన ఘనంగా జేజేలు పలుకుతున్నానని పవన్ కల్యాణ్ ప్రకటనలో తెలిపారు.

ఆదర్శ పాలనాదక్షుడు శ్రీ పి.వి.నరసింహ రావు గారు - JanaSena Chief Sri @PawanKalyan pic.twitter.com/83PWC1xWRq

— JanaSena Party (@JanaSenaParty) June 28, 2022