ఎన్నికల సమీపిస్తున్న వేళ తెలంగాణ రాజకీయాలు రోజురోజుకు వేడెక్కుతున్నాయి. ఎత్తులు పైఎత్తులతో అన్ని పార్టీలు ప్రచారంలో దూసుకుపోతున్నాయి. ఈ నేపథ్యంలో బీజేపీ కూడా స్పీడ్ పెంచింది. ఎన్నికల్లో కలిసి వచ్చే ఏ ఒక్క అవకాశాన్ని వదులుకోవడం లేదు. ఈ క్రమంలోనే జనసేన పార్టీతో పొత్తుకు మొగ్గు చూపుతుంది. ఇప్పటికే ఆ పార్టీ రాష్ట్ర అధ్యక్షుడు కిషన్ రెడ్డి జనసేన అధినేత పవన్ కల్యాణ్‌తో భేటీ అయిన సంగతి తెలిసిందే. సీట్లుపై చర్చించారని.. తమకు కనీసం 30 సీట్లు కావాలని పవన్ అడిగారు. అయితే బీజేపీ మాత్రం అన్ని సీట్లు ఇచ్చేందుకు సుముఖంగా లేదని తెలుస్తోంది. ఇటీవల 52 మంది అభ్యర్థులతో తొలి జాబితాను విడుదల చేసింది.

ఈ పరిణామాల నేపథ్యంలో కేంద్ర హోం మంత్రి అమిత్ షాతో పవన్ కల్యాణ్ భేటీ కానున్నారు. ఈ నెల 27న సూర్యాపేటలో జరిగే ప్రచార సభలో పాల్గొనేందుకు అమిత్ షా రాష్ట్ర పర్యటనకు రానున్నారు. ఆ సమయంలో ఇరువురు నేతలు భేటీ అయి సీట్ల సర్దుబాటుపై చర్చించే అవకాశం ఉంది. గురించి చర్చించనున్నారు. తెలంగాణలో కొన్ని స్థానాల్లో పోటీ చేయాలనే పట్టుదలతో జనసేన ఉంది. ఈ నేపథ్యంలో అమిత్ షాతో పవన్ భేటీ కీలకం కాబోతోంది. జీహెచ్ఎంసీ ఎన్నికల సమయంలో బీజేపీకి జనసేన సంపూర్ణ మద్దతును ప్రకటించింది.

కానీ ఇక ఈ ఎన్నికల్లో మాత్రం 32కి పైగా స్థానాల్లో పోటీ చేయాలని జనసేన భావిస్తోంది. ఏయే నియోజకవర్గాల నుంచి పోటీ చేయాలనే జాబితాను కూడా ఇప్పటికే విడుదల చేసింది. ఈ జాబితాలో ఏపీ సెటిలర్లు ఎక్కువగా ఉండే గ్రేటర్ హైదరాబాద్‌తో పాటు ఉమ్మడి ఖమ్మం జిల్లా సీట్లు ఎక్కువగా ఉన్నాయి. అయితే జనసేనకు 12 సీట్లు ఇచ్చేందుకు బీజేపీ అధిష్టానం అంగీకరించినట్లు సోషల్ మీడియాలో ప్రచారం జరుగుతోంది.