జాతీయ భద్రతా సలహాదారు (ఎన్‌ఎస్‌ఏ) అజిత్‌ ధోవల్ నివాసం వద్ద బుధవారం ఓ ఆగంతకుడు హల్‌చల్‌ చేయడంతో భద్రతా దళాలు ఉలిక్కిపడ్డాయి. ఉదయం ధోవల్ ఇంట్లోకి కారుతో దూసుకెళ్లేందుకు సదరు దుండగుడు యత్నించాడు. అప్రమత్తమైన భద్రతా సిబ్బంది ఆ కారును అడ్డగించి అతనిని అదుపులోకి తీసుకున్నారు. అనంతరం అతడిని ప్రశ్నించగా.. ఎవరో తన శరీరంలో చిప్‌ పెట్టారని, వారే తనను కంట్రోల్‌ చేస్తున్నారని చెప్పాడు.  

ఆ సమయంలో నిందితుడు ఇష్టానుసారంగా ప్రవర్తించాడు. గట్టిగా కేకలు వేస్తూ, తనను వదిలేయాలని, అజిత్ దోవల్‌తో పని ఉందంటూ మంకుపట్టు పట్టాడు. అయితే స్కానింగ్‌లో అతడి శరీరంలో ఎలాంటి చిప్‌ లేదని తేలడం గమనార్హం. అనంతరం అతడి మానసిక స్థితి సరిగ్గా లేదని ప్రాథమిక విచారణలో గుర్తించారు పోలీసులు. బెంగళూరుకు చెందిన ఆ వ్యక్తి అద్దె కారులో ధోవల్ ఇంటికి వచ్చినట్లు తెలుస్తోంది. తొలుత జనపథ్‌లోకి.. అక్కడి నేరుగా అజిత్ ధోవల్ నివాసంలోకి చొరపడే ప్రయత్నం చేశాడు. ఈ ఘటన చోటు చేసుకున్న సమయంలో అజిత్ ధోవల్ ఇంట్లోనే ఉన్నారని ఢిల్లీ పోలీసులు తెలిపారు. ఈ కేసులో దర్యాప్తు నిమిత్తం ఆ వ్యక్తిని ఢిల్లీ పోలీసులు ప్రత్యేక విభాగానికి అప్పగించారు.