விஜய்சேதுபதி, த்ரிஷா நடித்த '96' திரைப்படம் இந்த ஆண்டின் மிகப்பெரிய வெற்றி பெற்ற படங்களில் ஒன்று என்பதில் மாற்றுக்கருத்து யாருக்கும் இருக்க முடியாது. இந்த படத்தை பார்த்த பலர் தங்கள் குழந்தைகளுக்கு ராம், ஜானு என்று பெயர் வைப்பதாக கூட சமூக வலைத்தளங்களில் செய்தி வெளிவந்தது. அந்த அளவுக்கு இந்த கேரக்டர்கள் மக்கள் மனதில் ஆழ பதிந்துவிட்டது

இந்த நிலையில் '96' திரைப்படம் தெலுங்கு மற்றும் கன்னட மொழிகளில் ரீமேக் செய்யப்படவுள்ளதாக வெளிவந்த செய்தியை ஏற்கனவே பார்த்தோம். தெலுங்கில் ராம் கேரக்டரில் கோபிசந்த்தும், ஜானு கேரக்டரில் த்ரிஷாவும் நடிக்கவுள்ளனர்.

அதேபோல் இந்த படத்தின் கன்னட ரீமேக் படமான '99' திரைப்படத்தில் ராம் கேரக்டரில் கணேஷ் என்ற நடிகர் நடிக்கவுள்ளார். இந்த படத்தில் ஜானு கேரக்டரில் நடிகை பாவனா நடிக்கவுள்ளதாக தற்போது தகவல்கள் வெளிவந்துள்ளது. இவர் ஏற்கனவே அஜித் நடித்த 'அசல்', உள்பட பல திரைப்படங்களில் நடித்துள்ளார். கணேஷ், பாவனா ஆகிய இருவரும் ஏற்கனவே 'ரோமியோ' என்ற கன்னட படத்தில் நடித்துள்ளனர் என்பது குறிப்பிடத்தக்கது.