கோலிவுட் திரையுலகில் பிசியாக இருக்கும் இளம் நடிகர்களில் ஒருவர் ஜி.வி.பிரகாஷ். இவரது நடிப்பில் உருவான 'கடவுள் இருக்குறான் குமாரு' திரைப்படம் வரும் வெள்ளி அன்று வெளியாக உள்ளது. மேலும் இவரது நடிப்பில் உருவாகியுள்ள 'புரூஸ்லீ' திரைப்படத்தின் ரிலீஸ் தேதி விரைவில் அறிவிக்கப்படவுள்ளது.

இந்நிலையில் ஜி.வி.பிரகாஷ், 'அடங்காதே' என்ற படத்தில் நடித்து வருகிறார். இந்த படத்தின் படப்பிடிப்பு விறுவிறுப்புடன் நடைபெற்று வரும் நிலையில் இந்த படத்தில் பிரபல பாலிவுட் நடிகை தற்போது இணைந்துள்ளார்., ஆம், அவர்தான் மந்த்ராபேடி

கடந்த 2004ஆம் ஆண்டு சிம்புவின் 'மன்மதன்' படத்தில் டாக்டர் கேரக்டரில் நடித்த மந்த்ராபேடி, சரியாக 12 ஆண்டுகளுக்கு பின்னர் மீண்டும் 'அடங்காதே' என்ற தமிழ்ப்படத்தில் உத்தரபிரதேச மாநில போலீஸ் அதிகாரியாக நடிக்கின்றார்.

ஜி.வி.பிரகாஷ் ஜோடியாக சுரபி நடிக்கும் இந்த படத்தின் முக்கிய கேரக்டரில் சரத்குமார் நடித்து வருகிறார். சண்முகம் முத்துசாமி இயக்கி வரும் இந்த படத்திற்கு ஜி.வி.பிரகாஷ் இசையமைக்கின்றார். இந்த படத்தை ஸ்ரீ க்ரீன் புரடொக்ஷன்ஸ் நிறுவனம் தயாரித்து வருகிறது.