టీడీపీ యువనేత నారా లోకేశ్ ‘యువగళం’ పాదయాత్ర నేటి నుంచి పున:ప్రారంభం కానుంది. ఇవాళ ఉదయం 10.19గంటలకు పాదయాత్ర ప్రారంభంకానున్నట్లు పార్టీ వర్గాలు తెలిపారు. ఈ మేరకు పార్టీ నేతలు అన్ని ఏర్పాట్లు పూర్తి చేశారు. స్కిల్ డెవలప్‌మెంట్ కేసులో చంద్రబాబుకు రెగ్యులర్ బెయిల్ లభించడంతో పాదయాత్రను తిరిగి కొనసాగించాలని లోకేశ్ నిర్ణయించుకున్నారు. అయితే ముందుగా అనుకున్నట్లు ఇచ్ఛాపురం వరకు పాదయాత్ర కొనసాగడం లేదు.

విశాఖలో పాదయాత్ర ముగింపు..

ఈ ఏడాది జనవరి 27న ఉమ్మడి చిత్తూరు జిల్లా కుప్పంలో లోకేశ్ పాదయాత్ర మొదలుపెట్టారు. రాయలసీమలో పాదయాత్ర పూర్తి చేసి కోస్తా ప్రాంతంలోని డాక్టర్ బీఆర్ అంబేద్కర్ కోనసీమ జిల్లా రాజోలు వరకు కొనసాగింది. అయితే స్కిల్ డెవలెప్‌మెంట్ కేసులో అనూహ్యంగా చంద్రబాబును సీఐడీ అధికారులు అరెస్ట్ చేయడంతో పాదయాత్రకు విరామం ప్రకటించిన సంగతి తెలిసిందే. పాదయాత్రలో 208 రోజుల్లో 84 నియోజకర్గాల మీదుగా మొత్తం 2852.4 కిలోమీటర్ల దూరం నడిచారు. ఇదిలా ఉండగా గతంలో పార్టీ అధినేత చంద్రబాబు ‘వస్తున్నా మీకోసం పాదయాత్ర’ను విశాఖలోనే ముగించారు. అనంతరం జరిగిన 2014 ఎన్నికల్లో టీడీపీ అధికారంలోకి వచ్చింది. ఇప్పుడు అదే సెంటిమెంట్‌తో లోకేశ్‌ కూడా విశాఖలోనే పాదయాత్ర ముగించాలని భావిస్తున్నారు.

లోకేశ్ యువగళం పాదయాత్ర వివరాలు...

ఉ. 10.19 – రాజోలు నియోజకవర్గం పొదలాడ శుభం గ్రాండ్ వద్ద నుంచి పాదయాత్ర ప్రారంభం.
ఉ. 11.20 – తాటిపాక సెంటర్ లో బహిరంగసభ, యువనేత లోకేష్ ప్రసంగం.
మ. 12.35 – పి.గన్నవరం నియోజకవర్గంలోకి ప్రవేశం, నగరంలో గెయిల్, ఓఎన్జిసి బాధితులతో లోకేష్ ముఖాముఖి.
మ. 2.00 – మామిడికుదురులో స్థానికులతో సమావేశం.
మ. 2.45 – పాశర్లపూడిలో భోజన విరామం.
మ. 4.00 – పాశర్లపూడి నుంచి పాదయాత్ర కొనసాగింపు.
మ. 4.30 – అప్పనపల్లి సెంటర్ లో స్థానికులతో సమావేశం.
సా. 5.30 – అమలాపురం నియోజకవర్గంలో ప్రవేశం, స్థానికులతో మాటామంతీ.
సా. 6.30 – బోడసకుర్రులో మత్స్యకారులతో ముఖాముఖి.
సా. 7.30 – పేరూరులో రజక సామాజికవర్గీయులతో భేటీ.
సా. 7.45 – పేరూరు శివారు విడిది కేంద్రంలో లోకేష్ బస చేయనున్నారు.

రాజోలు,పి.గన్నవరం,అమలాపురం అసెంబ్లీ నియోజకవర్గాల మీదుగా పాదయాత్ర కొనసాగనుంది.