தளபதி விஜய் பிறந்த நாளை அவரது கோடிக்கணக்கான ரசிகர்கள் இன்று சிறப்பாக கொண்டாடி வருகின்றனர். நேற்று மாலை அவர் நடித்து வரும் 62 வது படமான 'சர்கார்' படத்தின் ஃபர்ஸ்ட்லுக்கும், நள்ளிரவில் செகண்ட் லுக்கும் வெளியாகி இணையதளங்களில் பெரும் பரபரப்பை ஏற்படுத்தியுள்ளது.

இந்த நிலையில் விஜய் ரசிகர்கள் பலர் அவருக்கு பிறந்த நாள் வாழ்த்து கூறும் போஸ்டர்களில் 'வருங்கால முதல்வர் விஜய்' என்ற வாசகங்களை பதிவு செய்தனர். இது பெரும் சர்ச்சையை கிளப்பிய நிலையில் இதுகுறித்து எஸ்.ஏ.சந்திரசேகர் ஒரு விளக்கத்தையும் கூறியுள்ளார் என்பதை ஏற்கனவே பார்த்தோம்.

இந்த நிலையில் 'வருங்கால முதல்வர் விஜய்' போஸ்டர் குறித்து இன்று அமைச்சர் செல்லூர் ராஜூ அவர்களிடம் செய்தியாளர்கள் கேட்டனர். அப்போது அதற்கு பதில் கூறிய அமைச்சர் செல்லூர் ராஜூ, 'நடிகர் விஜய்க்கு ரசிகர்கள் அதிகம் என்பதால் நாளைய முதலமைச்சர் என விளம்பரப்படுத்தியுள்ளனர். தமிழகத்தில் யார் வேண்டுமானாலும் அரசியலுக்கு வரலாம், முதல்வராகலாம்' என்று கூறியுள்ளார். அமைச்சரின் இந்த பதில் விஜய் ரசிகர்களுக்கு உற்சாகத்தை அளித்துள்ளது.